Бу күннэргэ Ньурба улууһун нэһилиэктэригэр улахан ойуур баһаардара тураннар, олохтоохтор буруо быыһыгар олороллорун ааһан, кыаллар дьон бары баһаары утары охсуһаллар.
Ыксаллаах кэмҥэ, ама, батсаап ситимэ бу сонунтан матыа дуо, ким тугу көрбүтүн хайдах ылынарынан тарҕата олорор. Ойуур баһаара буола турар Ньурба нэһилиэктэрин баһылыктарыгар эрийэн, бу чаастааҕы балаһыанньаны билистим. Ньурбачаан нэһилиэгин баһылыга Мария Семенова кэпсииринэн, нэһилиэккэ 545 киһи олорор. Бүгүн ойуур баһаарын буруотуттан (баһаартан буолбатах!) 33 киһини: 17 оҕону, 16 кырдьаҕаһы оптуобуска олордон күрэттилэр. — Нэһилиэккэ уоту киллэрбэт инниттэн, олохтоохтор күнүстэри-түүннэри субуотунньуктаан уоту бохсобут. Улуус дьаһалтата балаһыанньаны хонтуруолга тутан олорор. Эбии көмөлтө, тиэхиньикэ баар. Бары күүһүнэн нэһилиэкпитин «обороналаан» олоробут», — диэн иһитиннэрдэ баһылык.
Маар нэһилиэгэр, батсаапка суруйалларын курдук, дьону ыксалынан көһөрүү суох. Баһылык Иннокентий Саморцев этэринэн, 983 киһи олорор нэһилиэгэр балаһыанньа хонтуруолланар. «Дьаппыыда үрэх» уҥуор ойуур баһаара буола турар. «Хаҥалас уонна Маар нэһилиэктэрин икки ардыгар баар Кинээс Долокуната диэн сиргэ эр дьоммут субуотунньуктуу сылдьаллар», — диэн кэпсээтэ Иннокентий Прокопьевич.
Үөдэй баһылыга Мария Николаева этэринэн, эр дьоннуун-дьахтардыын нэһилиэккэ уоту киллэрбэт инниттэн, күнү быһа харабыллыыллар. «Нэһилиэкпит кыра — 200-чэкэ киһи олорор. Хаҥалас нэһилиэгин уота биһиэхэ сырылаан кэлэр буолан, манабылга сырыттахпытына эрэ табыллар. Саатар 15-20 м күүстээх балаһа тыал түһэн, балаһыанньа уустук. Дьахталлар күнүс манабылга сылдьар кэмнэригэр кыра оҕолору мунньан кулуупка көрөбүт-аһатабыт. Батсаапка тугу суруйа олороллорун кэтиир кыах суох. Нэһилиэктэн ким да куота илик. Ааһан иһэр айанньыттар ойуур баһаарын көрө-көрө ыксалы үөскэтэллэрэ буолуо», — диэн бэлиэтиир баһылык. … Биллэн турар, куттал баарын баар. Кэпсэтэ олордохпуна, баһылыктар үһүөн «төлөпүөн кэллэ, лесничэй эрийэн эрэр, дьон ыҥырар» диэн кэпсэтиибитин түмүктээбиттэрэ да ону туоһулуур. Ол эрээри «эвакуацияҕа» биир да нэһилиэк тиийэ илик. Кытаатыҥ, бэйэлэрэ да ыксыы, ыгылыйа сылдьар дьоҥҥо араас сураҕы тарҕатан, балаһыанньаны уустугурдумаҥ. Саха дьоно, уустук кэмҥэ бэйэ-бэйэбитин өйөһүөҕүҥ!
Елена ПОТОЦКАЯ, «Саха сирэ» хаһыат, edersaas.ru