Сыл ахсын бэс ыйын бастакы баскыһыанньатыгар сиртэн үрдүк үүнүүнү ыларга тутаах үлэлээх дьон, мелиоратордар, идэлээх бырааһынньыктара бэлиэтэнэр.
edersaas.ru
Мелиорация управлениетын Ньурбатааҕы салаата 20 үлэһиттээх, ол иһигэр штаты таһынан биир үлэһит баар. Судаарыстыбаннай сорудах быһыытынан, Ньурба улууһугар 2952 гектарга уонна Сунтаар улууһугар 540 гектарга нүөлсүтүү үлэтин тэрийэллэр.
Алексей Васильев, мелиорация управлениетын Ньурбатааҕы салаатын салайааччы:
— Быйыл аҕыс мөлүйүөн солкуобай суумалаах үлэни толоруохпыт. «Хаҥас кытыл» мелиоративнай систиэмэҕэ, Дьиикимдэҕэ 330 гектар, Куочайга 649 гектар сири нүөлсүттүбүт. «Харыйалаах» систиэмэтигэр, Чаппанда Туостааҕар уу киллэрэн, салгыы «Арыылаах» шлюз-регуляторыгар ыытан, 427 гектарга халыттыбыт. Бу нэдиэлэҕэ Дьаархан шлюз-регуляторыгар аһардыахпыт. Билигин итиннэ 370 гектартан 200-һэ туолан сытар. Марха өрүс уҥуор 511 гектардаах сири хабар «Муоһааны» мелиоративнай систиэмэ Илин Бөргөмдө, Арҕаа Бөргөмдө учаастактара уунан хааччылыннылар. Сунтаарга Элгээйи нэһилиэгэр 420 гектарга уу киллэрилиннэ. Тэхиниичэскэй базата мөлтөх буолан, 420-450 гааттан ордукка уу кыайан киирбэт.
Ньурба улууһа бу сылга сааскы халаан уутун аһардыыга 300 тыһ. солк. көрбүт. «Партнер» ХЭТ Күндээдэ сиригэр күһүн эрдэ быһыт оҥорон, бу саас 281 гааҕа ууну халыппыт. Ааспыт чэппиэргэ быһыты аһан, биир экскаваторы кытары “ДТ-75» тыраахтарынан дьуһуурустубалаан, хоруу бүөлэммэтин көрөллөр-истэллэр. Алексей Васильев кэккэ нэһилиэктэр мелиорацияҕа бэркэ ылсан үлэлииллэрин бэлиэтиир. Таркаайы баһылыга, уруккута кикбоксиҥҥа аан дойду икки төгүллээх чөмпүйүөнэ Василий Васильев Таркаайы, Акана сирдэригэр эбии ууну халытыыны эрдэттэн туруорсубута түмүктээх буолбут. Ол курдук, түөрт туонна сэлээркэни ылан, бэйэлэрин күүстэринэн хас да сиргэ буор быһыт оҥорон, алта ходуһаҕа (891 гектарга) уу халыппыттар. Аканаҕа тоҕус сиргэ (649 гектарга) уу киллэрэргэ үлэлэһэллэр. Онон Таркаайы баһылыга Василий Васильев, Акана баһылыга Ефрем Семенов ходуһаҕа үрдүк үүнүүнү хааччыйарга туһуламмыт үлэни иилииллэр-саҕалыыллар.
Тэрилтэ былааннаах үлэтин таһынан, улууһу уонна нэһилиэктэри кытары кыттыһан, Күндээдэҕэ, Аканаҕа уонна Таркаайыга 1700 гектар тыа хаһаайыстыбатын сирин нүөлсүттэ. Бу күннэргэ Сатаҕай күөлүн түһэрии үлэтэ саҕаланна. Итини таһынан, сири тупсарыы үлэтигэр кытталлар. Чаппандаҕа, Антоновка Куочайыгар уонна Хорулаҕа барыта холбоон 150 гектар ходуһаҕа дулҕа анньыллыахтаах, сороҕун бүтэрбиттэр, хаалбытын аны күһүн ситэриэхтээхтэр.
Ньурбаттан Геннадий АНТОНОВ, “Саха сирэ» edersaas.ru сайтка анаан.