Ньурба улууһун олохтооҕо Анна Кириллина тиэргэни киэргэтэр оҥоһуктарынан быйылгыттан саҥа дьарыктаммыт.
edersaas.ru
Ыал улахан оҕото буолан (бииргэ төрөөбүттэр биэстэр – икки кыыс, үс уол), уһанарга аҕата үөрэппит.
Анна үлэлэрин дьон «Инстаграмтан» көрөн үөрэтэллэр эбит. Мин эмиэ бу бэртээхэй оҥоһуктар хаартыскаларын биир батсаап бөлөҕөр көрөн сөбүлээн, кинилиин суруйсан билистибит.
Матырыйаалынан эрдэттэн хаһааныы
— Уһанар тэрилгин, матырыйаалгын эрдэттэн хаһаанарыҥ буолуо?
— Оннук. Фанераны ыаллыы нэһилиэктэн атыыласпытым. Маҥан «Эмаль» кыраасканы Ньурбаттан ылан элбэҕи анаан хаһааммытым. Колер арааһын ылан, тиэмэбэр сөп түбэһиннэрэн туттабын.
Павлин — маастар кылааһы ыытыы олуга
— Туох идэлээххиний?
— Идэбинэн алын сүһүөх кылаас учууталабын. Билигин Оҕо спортивнай оскуолатыгар тириэнэрдиибин. Пандемия кэмигэр «дьиэттэн үлэлээҥ» диэбиттэригэр, уолбун илдьэ дойдубар Малдьаҕарга кэлбитим.
— Маастар кылааһы ыытар санаа хайдах киирбитэй?
— Бэйэбэр диэн «Павлины» оҥостубутум. Ону инстаграммар таһаарбыппын көрөн, дьон көрдөһөн, аан бастакы маастар-кылааспын ыыппытым. Онно суруттарбыт 50-ча дьахтарга анаан видеоҕа уһулан үөрэппитим. Павлины мин полистирол диэн тутууга туттуллар матырыйаалтан оҥоробун. Түүтэ – «Роса» бытыылката. Биир павлиҥҥа 30-40 кола иһитэ барар. Маастар кылааска дьарыктаммыт дьахталларым «бытыылканы кырыйарга бириэмэ наада» дииллэр. Онон үгүстэрэ ылса иликтэр.
— Интэриэһинэй көтөрдөрү оҥорор эбиккин дии?
— Ити кэлин бэйэбэр диэн улар, фламинго оҥорбутум.
Ийэм сайын аайы сибэкки арааһын үүннэрэр буолан, сибэккитин иһитин киэргэтэрин олус сөбүлүүр.
Ол иһин «Роса» уонна «Кола» утахтар бытыылкалара мунньуллубуттарын көрөн, интэриниэти хасыһан, пластик бытыылкаттан бэртээхэй оҥоһуктары оҥоруохха сөбүн туһунан билбитим.
Киһи киһиттэн үөрэнэр
— Маастар кылааскын иккис павлин оҥорон ыыттаҕыҥ дии?
— Оннук. Бастаан утаа төбөтүн чааһа олох табыллыбатаҕа. Онуоха иккистээн көннөрбүппэр, бэртээхэй оҥоһук буолбута. Статуспар таһаарбыппар, хайҕаабыттара аҕай. Хата, иккис павлиным түргэнник табыллыбыта. Онон билиин араас улуус дьонун түмэн, бэйэм оҥоһуктарбар үөрэтэбин.
… Ити курдук, Ньурба нарын кыыһа Анна Кириллина бэртээхэй оҥоһуктары оҥорон, араас улуус дьонун тиэргэннэрин киэргэтэргэ уһуйар.
Елена ПОТОЦКАЯ, «Саха сирэ» хаһыат, edersaas.ru