Ньурба куоратын ыччата барытыгар көхтөөх

Ааптар: 
Бөлөххө киир:

Ньурба куоратын ыччата олоххо өрүү көхтөөҕүнэн биллэр.

Куоракка  7 үөрэх кыһата  баар: Степан Васильев  аатынан 1 №-дээх уонна 2 №-дээх Ньурба орто оскуолалара, 3 №-дээх алын кылаас оскуолата, А.Н. Чусовской аатынан Ньурбатааҕы тэхиньиичэскэй лиссиэй, Убайаан орто оскуолата, ону тэҥэ Дьокуускайдааҕы мэдиссиинэ кэллиэһин Ньурбатааҕы салаата уонна Ньурба тиэхиньикума.

“Ньурба куората” МТ баһылыга Александр Иванов  төрөөбүт дойдуларын сайдыытыгар улахан интэриэстээхтэрин бэлиэтээн туран, ааспыт сылы түмүктүүр тэрээһиҥҥэ ыччаттары анаан бэлиэтээбитэ.

  Ол курдук,  Мэдиссиинэ кэллиэһин Ньурбатааҕы салаата куорат уопсастыбаннай-култуурнай олоҕор «куорат эйгэтин тупсарыы» судаарыстыбаннай бырагыраама чэрчитинэн ыытыллыбыт үлэҕэ “Энергетик” кыбартаал тупсарыытыгар үлэлэспиттэрэ.

Онтон Ньурба тиэхиньикума  куорат уопсастыбаннай сирдэрин  тупсарыыга, соҕотох уонна аҕам саастаах дьоҥҥо тус көмөлөрүн бэлиэтээн туран, «Үтүө санаа дьыалата»  номинацияны  анаабыта.

Маны таһынан, устудьуоннар бэйэлэрин  интэриэстэринэн биирдиилээн Н.И. Харитонов-Николай Чуор аатынан “Кыталык” култуура дыбарыаһын иһинэн үлэлиир  араас кулууптарга  дьарыктаналлар.  Онон култуура бары тэрээһиннэригэр көхтөөх кыттыыны ылаллар. 

Биир оннук Ньурба куората ыыппыт “Тыыннаах куорат” култуурунай-спортивнай бэстибээл аһыллыытыгар үҥкүүлээбиттэрэ, “Ньурба Ньургуна” спорт хас да көрүҥэр күрэтэһии арыллыытыгар барабааҥҥа оонньообуттара күн бүгүҥҥэ диэри дьон-сэргэ уоһуттан түспэт.

Биһиги ыччаттарбыт оннук көхтөөх, талааннаах дьон, — диэн куорат дьаһалтатын пресс-киинэ социальнай ситимнэргэ  киэн тутта кэпсиир, суруйар.

Ыччат бэйэтин баҕатынан уопсастыбаннай тэрээһиннэри көҕүлүттэн тутар эрэ буоллаҕына, олоххо хамсааһын тахсар буоллаҕа. Маныаха Ньурба ыччата — бастыҥ холобур.

Елена ПОТОЦКАЯ, “Саха сирэ” хаһыат, edersaas.ru

Хаартыска: «Ньурба куората» МТ пресс-киинин тиксэриитэ.

+1
0
+1
0
+1
0
+1
0
+1
0
+1
0
+1
0