Ньурба куоратыгар 2022 сыл Ньурба патриотын сылынан биллэрилиннэ.
Бу туһунан куорат баһылыга Александр Иванов «Кыталык» Култуура дьиэтигэр ааспыт сыллааҕы үлэ түмүгүн отчуоттуур мунньахха иһитиннэрдэ.
— Отчуот сонун пуорманан ыытыллыбытын куорат олохтоохторо сэргии ылыннылар. Ол курдук, 2021 сылга ыытыллыбыт хас биирдии суолталаах үлэ тустаах хаартыскаларынан, сыыппараларынан бигэргэнэн, дьон болҕомтотун тарта. Баһылык ыытыллыбыт үлэ ис хоһоонун, суолтатын быһааран биэрдэ. Биир чаҕылхай уонна ураты өрүт — Ньурба куората 2030 сылга диэри сайдыытын тосхолун сырдатыы.
Былааннаммыт үлэ, бырайыак ситэриллибит көстүүтүн видеонан сыыппара нөҥүө ойуулаан көрдөрүү (визуализация) куорат кэскиллээх сайдыытын харахха чуо ойуулааһын буолан, олус сонуннук көһүннэ. Бу аныгы технология сайдыытын биир сонун холобурун быһыытынан көстөн, куйаар ситиминэн отчуокка кыттыбыт дьону олуһун соһутта, долгутта, сүргэтин көтөхтө.
Тэрээһин иккис түһүмэҕэ — Ньурба куорат сайдыытыгар дьоһун кылааттарын киллэрбит биир дойдулаахтарбытын чиэстээһин. Баһылык «Ньурба куоратын социальнай-экономическай сайдыытыгар кылаатын иһин» бочуоттаах анал бэлиэни уонна ааспыт сылга оҥоһуллубут үтүө дьыалаларга номинациялары олохтоон, тустаах дьону бэлиэтээтэ.
Тэрээһин саамай бэлиэ уонна долгутуулаах түгэнэ — Ньурба куорат тэрилтэлэрин икки ардыгар ыытыллыбыт «Тыыннаах куорат» култуурунай-спортивнай бэстибээл кыттыылаахтарын, кыайыылаахтарын чиэстээһин. Үлэ кэлэктииптэрин сомоҕолуур, куорат ааспыт сыллааҕы олоҕун биир чаҕылхай тэрээһинигэр актыыбынай кыттыыны ылбыт СӨ ОДьКХ Ньурбатааҕы филиалалын кэлэктиибэ муҥутуур кыайыылааҕынан буолла.
Куорат баһылыга Александр Иванов бу иллээх кэлэктиипкэ 500 тыһ. солк. сэртипикээти үөрүүлээх быһыыга-майгыга дохсун ытыс тыаһыгар доҕуһуоллатан туттарда.
Быйыл тапталлаах Ньурбабыт куорат статуһунан сайдыбыта 25 сыла. Ааспыт сылы түмүктүүр «Түмүк. Кэскиллээх былаан» үгэс буолбут тэрээһиҥҥэ куорат баһылыга Александр Иванов 2022 үбүлүөйдээх сылы «Ньурба патриотын сылынан» биллэрдэ. Онон кэскиллээх былааннар, сонун сүүрээннэри түстүүр сонун бырайыактар олоххо киириилэрэ төрөөбүт дойдубутугар төһө бэриниилээхпитин бигэргэтиэхтэрэ, дойдубут сайдыытын туһугар ис сүрэхпититтэн баҕаран туран бары тэрээһиҥҥэ кыттыыбыт — бу барыта хас биирдиибит Ньурба куоратын патриотын быһыытынан арылларбытыгар олугунан буолуоҕа, — диэн Ньурба куоратын пресс-киинэ иһитиннэрэр.
Елена ПОТОЦКАЯ, «Саха сирэ» хаһыат.
Хаартыска — Ньурба куоратын пресс-киинэ тиксэриитэ.