Бэҕэһээ Ньурба куорат баһылыгын быыбара буолла. Түмүккэ 1789 куолаһы ылан, улуус баһылыгын быыбарыгар иккис миэстэни ылбыт Александр Иванов талылынна.
edersaas.ru
Быыбарга түөрт кандидат регистрацияламмыта. Партиялаахтартан диэн “Биир ньыгыл Россияттан” Ньурба куорат баһылыгын солбуйааччынан үлэлии олорбут Николай Бурнашев кииристэ. Уонна үс киһи кандидатураларын бэйэлэрэ туруорунан кытыннылар: “Арыылаах” хаһаайыстыба генеральнай дириэктэрэ Алексей Тихонов, Күндээтэттэн төрүттээх Владимир Герасимов уонна “Нэһилиэк” бырайыак бырабылыанньатын бэрэссэдээтэлэ Александр Иванов.
“Улуус баһылыгын быыбарыгар да, манна да баартыйаттан киирсибэтим. Мин санаабар, нэһилиэк, кыра куорат баһылыга бэлиитикэҕэ наһаа кыттыспат, кини үлэтэ үксүн хаһаайыстыбаннай боппуруостар буолаллар. Тус бэйэм “Биир ньыгыл Россия” баартыйа ыытар бэлиитикэтин өйүүбүн”, — диэн этэр Александр Игнатьевич.
Быыбар күн куоракка барыта 10 быыбардыыр учаастак үлэлээбитэ. Быыбарга барыта 3620 киһи куоластаата. Ити куоластааччылар 46,52 % ылар. Ньурба куоратыгар барыта 7822 быыбардааччы баар.
Александр Иванов бу иннинэ Ньурба улууһун баһылыгар кытта сылдьыбыта. Иккис миэстэни ылбыта. “Мин санаабар, үчүгэй, ыраас быыбар ааста. Бу иннинэ улуус баһылыгын быыбарыгар кыттыбытым улахан уопут буолла. Ньурбам олохтоохторугар барҕа махталбын тириэрдэбин”, — диэн бэлиэтиир кини.
Түмүккэ Александр Ивановка быыбардааччылар 48,51 % куоластаатылар. Николай Бурнашев – 1531, Алексей Тихонов – 298, Владимир Герасимов – 18 куолаһы ыллылар.
Ыспыраапка:
Александр Игнатьевич Иванов – Ньурба куорат баһылыга.
1980 с. балаҕан ыйын 17 күнүгэр Ньурба улууһун Дьаархан нэһилиэгэр төрөөбүтэ.
1987-1994 сс. Дьаархан орто оскуолатыгар, 1994-1997 сс. Ньурбатааҕы техническэй лицей-оскуолаҕа үөрэммитэ.
1997-2001 сс. Санкт-Петербурдааҕы бизнес уонна быраап институгар үөрэммитэ.
2001-2003 сс. Санкт-Петербурдааҕы тас экономическэй сибээстэр, экономика уонна быраап институттарын үөрэнэн бүтэрбитэ.
2004 с. Дьокуускайга ГАВС менеджерынан үлэлии киирбитэ.
2012 с. Дьаархан баһылыгынан талыллыбыта.
Аграфена КУЗЬМИНА, «Саха сирэ» хаһыат, edersaas.ru