Ньурба, Үөһээ Бүлүү бары нэһилиэктэрэ оптикаҕа холбонуохтара

Ил Дархан Айсен Николаев этэринэн, Бүлүү бөлөх улуустарыгар оптика — түргэн интэриниэт киирэн, олохтоох оҥорон таһаары 5% үрдүөҕэ. Аныгы олоххо киһи барыта үөрэҕэр-үлэтигэр туттар ситимэ сыыдамсыйбыта, аан дойду тиһилигэр холбоммута олох бары эйгэтигэр, тыа сирин сайдыытыгар дьоһун кылааты киллэриэҕэ. Ол туһунан дьон санааларын маннык үллэстэллэр.    

edersaas.ru

Владимир Поскачин, Үөһээ Бүлүү улууһун баһылыга:

— Үөһээ Бүлүү олохтоохторун аатыттан улууспутугар 4G уонна оптика киллэрбиккитигэр барҕа махталбытын тиэрдэбит. Аан дойду ситимигэр холбонон, билигин олоҕу кытта тэҥҥэ хаамыахпыт, IT технологияны үөрэххэ, үлэҕэ, күннээҕи олоххо туттуохпут. «Ростелеком» хампаанньа Саха сиринээҕи салаатын дириэктэрин Константин Войтеховскайы кытта көрсөн, кэлэр үс-түөрт сыл иһигэр оройуон бары нэһилиэктэрин түргэн тэтимнээх Интэриниэккэ холбуур туһунан кэпсэтэн, сөбүлэһии түһэрсибиппит.

Николай Петров, урбаанньыт: 

— Оптика, 4G киирэн киһи барыта «Instagram»-ҥа олорор. IP-TV холботторон, 990 телеканалы көрөбүт. Ыйга интэриниэппит төлөбүрэ 3000 солкуобай, куораттан таһыччы үрдүк, манна киһи ахсаана аҕыйах, ол иһин буолуо. Бүлүү бөлөх улуустарыгар Мииринэйтэн «Ростелеком» оптиканы бэйэтэ тардан киллэрдэ, онон ороскуоттарын сабынаары сыананы түһэрбэттэр быһыылаах. Билиҥҥитэ түргэн интэриниэккэ федеральнай айан суолун аттынааҕы нэһилиэктэр: Дьаархан, Маар, Хаҥалас, Үөдэй холбоннулар. Биһиэхэ, урбаанньыттарга 1С бырагырааманан отчуот оҥоруу, ону ыытыы түргэтээтэ, үлэбитигэр видеокамераны туһанабыт. Нолуогабайга электроннай счет арыйан, үлэлэһэбит. Бырааска кытта электроннай уочарат киирдэ.  Интэриниэт сыыдамсыйан, «Индрайвер» такси сыаната чэпчээтэ, Ньурба иһигэр 150 солкуобайтан биир мөһөөккө диэри түстэ.

Марианна Тыртыкова, «Саха сирэ», edersaas.ru