Бу күннэргэ Ньурба улууһун Үөдэй нэһилиэгин эр дьоно Бөкчөөлө түбэтигэр Тыымпы күөлгэ куйуурдаатылар.
— «Эбэбит быйыл балыгынан дэлэйдик күндүлээтэ» диэн дьоммут үөрүүлэрэ сүрдээх. Бастакы күн — 3, иккис күн 7 куулу ылан, дьиэлэригэр үөрэн-көтөн кэллилэр.
Саха төрүт дьарыгар уол оҕону кыратыттан үөрэтии-такайыы — бу ыал аҕатын ытык эбээһинэһэ. Оччоҕо уол оҕо улаатан бэйэтэ бултаан, дьиэ кэргэнин иитиэ турдаҕа.
Саамай үлэлээҕэ — балык ханан муста сытарын көрдөөн булуу. Үөдэй эр дьоно бырааһынньыктарын көрсө биир дойдулаахтарыгар — нэһилиэктэрин олохтоохторугар сибиэһэй собону амсатан үөртүлэр.
Үөдэйдэр куйуурдаан балык ылбыттарын билэн, ыаллыы олорор хаҥаластар, аканалар, маардар кытта тиийэн кэлбиттэр. Ньурбаттан эмиэ айаннаан кэлэн, ирээт балыктарын ылан дьиэлээтилэр. Өрөбүллэри ити курдук эр дьоннор туһалаахтык атаардылар.
Кырачаан үөдэйдэр Максим, Самсон балыктыырга үөрэннилэр, «куйуур, түөрэй» диэн туох суолталарын биллилэр, — диэн кэпсиир уопсастыбаннай кэрэспэдьиэммит, Үөдэй нэһилиэгин баһылыга Мария Николаева.
Елена ПОТОЦКАЯ, «Саха сирэ» хаһыат.