Ньурба Дьаарханыгар сууллубут хотону чөлүгэр түһэриигэ министиэристибэ, улуус көмөлөһүөхтэрэ

Бүгүн Ньурба Дьаарханыгар бырабыыталыстыба отчуотугар кэлэн баран, аҕыйах хонуктааҕыта сууллубут хотону тиийэн көрдүм. Бу — «Саһарҕа» ХЭУо 118 сүөһүтэ кыстаан турбут хотоно.

edersaas.ru
Хаһаайыстыба салайааччыта саахал инниттэн балыыһаҕа эмтэнэ сытарынан, нэһилиэк тыа хаһаайыстыбатыгар исписэлииһин Саргылаана Терентьеваны көрсөн кэпсэттим. «Хотону 2015 сыллаахха хаһаайыстыба олохтоох биригээдэҕэ туттарбыта, — диир Саргылаана Семеновна. — Куораттан кэлэн үөрэтэн, көрдөрөн биэрбиттэрэ. Туттуллубут конструкцияны аҕалан туруорбуттара дииллэрэ сымыйа. Саҥаны атыылаһан аҕалбыттара. Тимирэ бэйэтэ сымнаҕас быһыылаах. Хамыыһыйа үөрэтэн-чинчийэн баран, түмүк таһаарыахтаах».
Бу 100 миэстэлээх хотон хаһаайыстыбаннай ньыманан тутуллубут. Улуус, нэһилиэк уонна хаһаайыстыба үбүгэр кыттыспыттар. Улуустан 2,5 мөл. солк. үп бэриллибитин үрдүнэн улуус тутуу хаачыстыбатын хонтуруоллаабатах. Онон тутуу технологиятыгар кэһии баара биллэр. Тыа хаһаайыстыбатын министиэристибэтин сүөһүнү иитиигэ уонна племенной үлэҕэ департаменын салайааччыта Артем Александров сылдьан көрөн баран, хотону аны сайын чөлүгэр түһэрэргэ эппит уонна онуоха министиэристибэ көмөлөһүөҕэр эрэннэрбит. Онон хаһаайыстыба, нэһилиэк салалталара миниистир, улуус баһылыгын ааттарыгар суруйбуттар.
Манна сыһыаран эттэххэ, «Саһарҕа» ХЭУо бу эҥээргэ соҕотох улахан тэрээһиннээх хаһаайыстыбанан биллэр. Нэһилиэккэ ону таһынан 6 бааһынай хаһаайыстыбата уонна 30 кэтэх хаһаайыстыба ынах сүөһүнү иитиинэн дьарыктаналлар. Дьаархаҥҥа барыта 624 ынах сүөһү иитиллэн турар. Аҕыйах сыллааҕыга диэри тыһыынчаттан тахса сүөһүлээхтэрэ. Сарбыллыы төрүөтэ — ыаллар сааһыраннар, сүөһүлэрин эһэллэрэ. Эстии суолуттан бааһынайдар уонна бу «Саһарҕа» курдук чааһынай тэрилтэ бөдөҥсүйүүлэрэ эрэ быыһыан сөп. Онон баар хаһаайыстыбалары өйүүр, кыаҕырдар сорук турара чуолкай. Бырабыыталыстыба отчуотун кэмигэр кэпсэтиигэ улуус баһылыга Алексей Иннокентьев эмиэ көмөлөһөргө эрэннэрдэ.
«Саһарҕа» ХЭУо сүөһүтэ кыстык бүтүөр диэри бааһынайдар, кэтэхтэр хотонноругар туруоҕа.

Василий Никифоров, edersaas.ru