Ньурба Чуукаарын кулууба куйаар ситиминэн үлэлиир

Ааптар: 
Бөлөххө киир:

Сыстыганнаах дьаҥынан сибээстээн, дьон дьиэтигэр олорор кэмигэр Ньурба улууһун Чуукаардааҕы Е.М.Поликарпов аатынан «Эйгэ» норуот айымньытын киинэ куйаар нөҥүө араас тэрээһини ыытарга идэтийдэ.

Онон олохтоохтор дьиэлэригэр олорон, айар куттаах биир дойдулаахтара тэрийэр бары тэрээһиннэрин көрө эрэ олорбокко, онно бэйэлэрэ эмиэ актыыбынайдык кытталлар.

Норуот айымньытын киинин үлэһиттэрэ, маны таһынан, бэйэлэрин тэрээһиннэригэр өрөспүүбүлүкэ улуустарын араас нэһилиэктэрин хабан, бэрт сэргэх, сонун тэрээһиннэри ыыталлар. Бу туһунан биһиги уопсастыбаннай кэрэспэдьиэммит Сэргэн Лэкээрин бу курдук кэпсиир:

Улууспутугар Төрөөбүт тыл уонна сурук дэкээдэтэ түмүктэннэ. Бу дэкээдэ чэрчитинэн биһиги кииммит  хоһоон айыытыгар куйаар ситиминэн  «Саха сүргэтин көтөҕөр» куонкурус биллэрбитэ. Онно араас улуустан  7 айар тыл алыбыгар куустарбыт дьон кытыннылар: Александр Васильев, Дмитрий Романов-Алтан-Халан (Горнай), Владислав Аргунов (Сунтаар), Айтал Степанов (Нам), Мария Поскачина (Дьокуускай), Елизавета Березкина (Мэҥэ Хаҥалас), Илья Иванов-Хоһуун (Ньурба, Хорула). Түмүккэ  кыайыылааҕынан ааттанна Ньурба улууһун Хорула нэһилиэгин олохтооҕо  Илья Иванов-Хоһуун. 

Ийэ тыл уонна сурук-бичик дэкээтин түмүктүүр киэһэтин норуот айымньытын киинэ эмиэ бэрт сонуннук тэрийэн ыытта.  Нэһилиэк олохтоохторо «Саха» НКИХ бээтинсэ аайы ыытар «Өркөн өй»  биэриитигэр олоҕуран, «чуукаардардыы» ис хоһоонноон — тэрилтэлэри кытыннаран   ыыттылар.

 Методист Ульяна Иванова салайыытынан  Дьиэ-уот коммунальнай хаһаайыстыбатын салаатын хамаандата — боруонса, бэтэринээрдэр хамаандалара — үрүҥ көмүс, почта уонна урбаанньыт И.И. Федорова  атыыһыта кыттыгастаах хамаандата  —  кыһыл көмүс, оскуола хамаандата — үрүҥ көмүс, олохтоох дьаһалта хамаандата — боруонса мэтээллээх тарҕастылар.

Бу курдук тыа сирэ аныгы  технология сүүрээнин туһанан, Чуукаардааҕы Е.М.Поликарпов аатынан «Эйгэ» норуот айымньытын киинин үлэһиттэрэ биир дойдулаахтарын сырдыкка-кэрэҕэ сирдии турар соруктаах үлэлииллэр. 

Елена ПОТОЦКАЯ, “Саха сирэ” хаһыат, edersaas.ru

 

+1
0
+1
0
+1
0
+1
0
+1
0
+1
0
+1
0