«Ньурба улууһа» муниципальнай тэриллии баһылыгын урукку солбуйааччыта Ю.Николаевка суут бириигэбэрэ тахсыбытын туһунан СӨ Борокуратуурата иһитиннэрдэ.
Суут быһаарбытынан, 2014 сыл атырдьах ыйыгар Ньурба улууһун «Инвестиционнай тутуу управлениета» МКУ уонна «СтройТехнология» ХЭУо муниципальнай хантараак түһэрсибиттэр. 2016 сыл алтынньы 10 күнүгэр диэри болдьоххо Ньурба куоратыгар 3000 миэстэлээх, ытар тиирдээх стадион тутарга диэн. Онуоха баара, бэдэрээтчит ыйыллыбыт болдьоххо диэри эбийиэги тутан бүтэрбэтэх, ону ааһан, 2015 сыл алтынньы ыйыттан туох да үлэ ыытыллыбатах.
Маныаха Ньурба улууһун баһылыгын солбуйааччы Николаев «О контрактной системе в сфере закупок товаров, работ, услуг для обеспечения государственных и муниципальных нужд» диэн федеральнай сокуону кэһэн, 2015 сыл ахсынньытыгар баһылык эбээһинэһин толорор кэмигэр сокуоннайа суох дьаһал уонна бирикээс таһаарбыт — тутааччыга 6 мөл. 600 тыһ. солк. эрдэ төлүүргэ диэн.
Суут дьыаланы көрөн баран, Николаевы РФ Холуобунай кодексатын 286-с ыст. 3-с чааһын «в» пуунунан, ол эбэтэр, ыарахан содулу аҕалан туран, дуоһунас боломуочуйатын аһара барыы бэлиэтэ баарынан буруйдааҕынан билиммит. Итиэннэ судаарыстыбаннай буруйдааччы (борокуруор) туруорсуутун, сууттанааччы характеристикатын учуоттаан, 4 сылга көҥүлүн быһары усулуобунайынан ааҕан, 2 сыл 6 ыйга тургутар болдьоххо уурбут.
Манна эбии икки сыл устатыгар судаарыстыбаннай, олохтоох салайыныы уорганнарын дуоһунастарыгар үлэлиир быраабын быспыт. Бириигэбэр сокуоннай күүһүгэр киирэ илик.
Санатар буоллахха, бу холуобунай дьыала Ньурба улууһун борокуратууратын уонна РФ Куттал суох буолуутун федеральнай сулууспатын Саха сиринээҕи управлениетын бииргэ бэрэбиэркэлиир үлэлэрин түмүгэр тэриллибитэ.
Маны таһынан, СӨ Арбитражнай суутун быһаарыытынан, «Инвестиционнай тутуу управлениета» МКУ сайабылыанньатынан, «СтройТехнология» тэрилтэттэн 17 692 500 солк., ол иһигэр, стадиону тутууга эрдэ төлөммүт харчыны эмиэ, ирдэһэн ылбыттар.
Биһиги корр., «Саха сирэ» хаһыат, edersaas.ru
Хаартыска: интэриниэттэн.