Кэлиҥҥи кэмҥэ ыал буолан, дьиэлэрин бэйэлэрэ туттар, оҕолорун сайдыыларыгар туһалаах тэриллэри тутан биэрэр, киһи холобур оҥостор ыччаттара элбээбиттэрэ – тыа сирэ кэскиллээхтик сайдарын биир чаҕылхай туоһута.
edersaas.ru
Ньурба улууһун Антоновкатын олохтооҕо Артем Иванов киһи холобур туттар ыал аҕата. Кини 2004 сылтан Ньурбатааҕы баһаарынай харабыл отделениетын хамандыырынан үлэлиир.
Дьоруойбунуун кэпсэтиибитин уһаныыга сатабыла хаһааҥҥыттан саҕыллыбытыттан саҕалаатыбыт.
Оҕону успуорка уһуйуу
— Кэргэмминиин Ньурба Хорулатыттан төрүттээхпит. Ньурба куоратыгар үлэлиир буолан, Антоновкаҕа учаастак ылан, дьиэ туттан олоробут. Үс оҕолоохпут. Улахан кыыһым Васияна социальнай кэллиэс устудьуона, иккис кыыһым Августина Алдаҥҥа хайыһарга олимпийскай резервэ иитиллэччитэ буолан, онно 9-с кылааска үөрэнэр. Уолум Александр – боксер. Быйыл олимпийскай резервэ училищетыгар Дьокуускайга ылыах курдуктар.
Икки оҕом улахан успуорка уһуйуллан эрэллэриттэн үөрэбин. Уол буоксаҕа Бүлүү бөлөх улуустарын хас да төгүллээх чөмпүйүөнэ. Куоракка кадеттар буоксаҕа күрэхтэрин, кик-боксинг хас да төгүллээх чөмпүйүөнэ. Кыыһым хайыһарга Уфаҕа, Владивостокка сборданан кэлбитэ, Саха сирин чөмпүйүөнэ.
Бэйэм дьиэ туттан киириэхпиттэн ыла уһанар буоллум. Спортсмен оҕолордоох буолан, тэлгэһэбин спортивнай снарядтарынан толорон эрэбин. Туттар тэрилим барыта бэйэм оҥоһуум. Тимир иһэрдиигэ, быһыыга тэриллэри, ыал буолаат, атыыласпытым. Бэйэм баҕаран туран тимири иһэрдиигэ үөрэммитим. Сүрүн соругум «дьон сатыырын тоҕо мин сатыа суохтаахпыный?» диэн этэ. Сыыйа маһынан эмиэ уһанар буолбутум. Уһанар матырыйаалым боростуой. Холобура, брусья, пресс, «груша стойката» — онтон-мантан хомуллубут ыһылла сытар тимирдэр этэ. УАЗ массыына подшипнигар тиийэ баар.
Спортивнай тэриллэр – бэйэ илиитинэн
Элбэх функциялаах (многофункциональнай) перекладина. Бу икки балаһыанньаҕа көһөрөн иилиллэр тэрил. Холобура, маннык турарыгар пресс, илии хачайдыахха сөп. Ити перекладина уонна штанга профильнай тимирдэрин маҕаһыынтан ылан онорбутум.
Турбаларынан ыйааһыннах «грушаҕа» стойка тимиринэн оҥорбутум.
Кыра «груша». Туттаһыктара: аллараа өттө — арматура, үөһэ өттө – «угольникка» туттарыллар.
Тутум эргиир — сахалар спортивнай көрүҥнэрэ. Бириэмэҕэ оҥоһуллар.
Бу – штанга. Сытан эрэ ыйааһыннаах тимирдэри анньарга. Штангата — көннөрү турба уонна ДТ-75 тыраахтар көлүөһэлэрэ.
Пресс-тренажер. Олорон эрэ пресс хачайдыырга оҥорбутум.
Маска эмиэ уһаннахпына уһанабын. Уолбунаан беседка оҥорбуппут.
Оҕолорбун уһанарбар эмиэ көмөлөһүннэрэбин. Онон бэйэлэрэ тэҥҥэ сылдьан тутуһар буолан, ыйан-кэрдэн биэрэллэр. Туһугар, икки өттүттэн туһалаах үлэ.
… Ити курдук, Артем Иванов ыыппыт хаартыскаларын көрөн баран, ама, хайдах маннык тэлгэһэттэн чөмпүйүөннэр үүнэн тахсыахтара суоҕай дии саныыгын. Тускутугар туһаныҥ, аҕалар!
Елена ПОТОЦКАЯ, «Саха сирэ» хаһыат, edersaas.ru