Үс сыллааҕыта Ньурбаҕа сүөһү аһылыгын бэлэмниир хампаанньа быраҕыллыбыт бааһыналары сөргүтүүнү уонна ходуһалары күрүөлээһин үлэтин саҕалаабыта.
Быйыл “Күндээдэ” уонна “Сиибиктэ” бааһынай хаһаайыстыбалар 214 гектар сиргэ өр сыллаах оту ыспыттара. Билигин ыспыт отторо үчүгэйдик үүнэн эрэр, үлэ ситиһилээхтик ыытыллыбыта көстөр. Ньурба оройуонун аҕа баһылыга Алексей Иннокентьев:
—Өрөспүүбүлүкэҕэ судаарыстыбыннай бырагыраама ылыллан, улуус тэҥҥэ үбүлэһэн быраҕыллыбыт бааһыналар чөллөрүгэр түһэн, силигилии үүнэн эрэллэрин көрөн киһи үөрэр. Тыа хаһаайыстыбатын министиэристибэтин кытта Ньурбаҕа сүөһү аһылыгын бэлэмниир хампаанньа нөҥүө үс сыл устата күүстээх үлэ ыытылынна. Бу хампаанньа тиэхиньикэнэн олус үчүгэйдик хааччылынна. Италияҕа, Японияҕа оҥоһуллубут аналлаах массыыналар тигинэччи үлэлии сылдьаллар. Ньурбаҕа сүөһү аһылыгын бэлэмнииргэ биллэр сайдыы баар буолуо, Ньурбаҕа сүөһү аһылыгын бэлэмниир хампаанньа кэлэр сылларга салгыы улахан үлэни ыытыаҕа диэн былааннаахпыт.
Ону таһынан оройуоҥҥа 64 гектар сиргэ үрдүк үүнүүлээх оттору ыһан элбэх сыл ситэр үүнээйилэр питомниктара тэриллибит. Бу сиртэн от сиэмэтин хомуйан оройуон хаһаайыстыбаларыгар түҥэтии үлэтэ тэриллиэхтээх. Ньурба оту үүннэриигэ урукку кэмҥэ үгэс буола сылдьыбыт ньымаларыгар саҥаттан төннүбүтэ, оройуоннарга тыа хаһаайыстыбаларыгар улахан туһаны аҕалыа диэн исписэлиистэр мэктиэлииллэр.
Егор Карпов, «Саха сирэ» хаһыат