Бүгүн Ньурба куорат “Вертолетка” микро-оройуонугар 280 миэстэлээх “Кэскил” оҕо уһуйаанын таас дьиэтин бастакы сыбаайата түһэрилиннэ. Улууска маннык баараҕай эбийиэк тутуллуута “Үөрэхтээһин” национальнай бырайыакка киллэриллэн, федеральнай бүддьүөттэн үбүлэнэр буолла. Быйыл манна 106 мөл. солк. көрүлүннэ.
Бэлиэ тэрээһиҥҥэ Ньурба улууһун уонна куорат салайааччылара, Дьокуускайтан ыалдьыттар, үөрэх тэрилтэлэрин, оҕо уһуйааннарын үлэһиттэрэ, төрөппүттэр уо.д.а. кытыннылар.
Сахалыы сиэри-туому норуот талааннааҕа Валентина Сухаринова толордо. Истиҥ эҕэрдэ тылы улуус баһылыга Алексей Иннокентьев, улуус сүбэтин бэрэссэдээтэлэ Сергей Евсеев, Ил Түмэн аппараатын информационнай-аналитическай управлениетын салайааччытын солбуйааччыта Георгий Иванов, Ньурба куорат баһылыгын солбуйааччы Яков Замятин, Амма улууһун баһылыга Николай Архипов, бэдэрээтчит – “Ярус” ХЭТ салайааччыта Степан Петров эттилэр. Кинилэр национальнай бырайыакка уонна федеральнай бырагыраамаларга кыттан үлэ маннык салҕанан бара туруоҕар бигэ санаалаахтарын уонна үтүөнү баҕаралларын биллэрдилэр.
Үөрүүлээх быһыыга-майгыга улуус баһылыга Алексей Иннокентьев, ИСУ салайааччыта—улуус баһылыгын тутууга уонна ОДЬКХ-ҕа солбуйааччыта Макар Семенов, улуустааҕы үөрэх управлениетын салайааччыта Алевтина Аргунова уонна “Кэскил” оҕо уһуйаанын дириэктэрэ Оксана Самсонова сыбаайаны түһэриигэ ыҥырылыннылар.
Ньурба 1-кы №-дээх “Кэскил” оҕо уһуйаана хас да хонугунан тэриллибитэ 90 сылын бэлиэтиир. Оҕо саадын элбэх ахсааннаах үлэһиттэригэр, төрөппүттэригэр уонна иитиллээччилэригэр бүгүҥҥү күн бу курдук улахан үөрүүнү аҕалла. Бу улууска бастакынан тутуллар маннык баараҕай оҕо уһуйаанын дьиэтэ 2020 сыл ахсынньы ыйыгар бүтэн үлэҕэ киирэрэ былааннанар.
1982 сылтан манна дириэктэринэн ситиһиилээхтик үлэлии-хамсыы сылдьар РФ уопсай үөрэҕин бочуоттаах үлэһитэ, СӨ үөрэҕин үтүөлээх үлэһитэ уонна СӨ үөрэҕин туйгуна Оксана Самсонова кинилэр өр кэмҥэ кэтэспит кэтэһиилэрэ туолан олоххо киирэн эрэриттэн улаханнык үөрэрин биллэрдэ.
