Саҥа дьыл кэнниттэн, будулҕан туманнаах тохсунньу ыйга Ньурба улууһун Антоновка орто оскуолатыгар тюльпаннар тылыннылар. Оскуола бизнес-инкубаторыгар оҕолор сибэкки олордон, атыылаан, биисинэстэрин сайыннараллар диэн Ньурбатааҕы үөрэх управлениета иһитиннэрэр.
— Сибэккилэрбит олус бэркэ үүннүлэр. Бастаан боруобаҕа диэн, аҕыйах соҕуһу олордубуппут. Мантан саас, уопутуран баран, элбэҕи олордор былааннаахпыт. Оҕолорго бу олус үчүгэй уопут. Кулун тутар 8 күнүгэр Ньурба улууһун кэрэ аҥаардарын үөрдэр-көтүтэр санаалаахпыт, — диэн производственнай үөрэх маастара, химия учуутала Саргылаана Николаева этэр.
Маны тэҥэ, оҕолор бэйэлэрэ туох да химическэй эбилигэ, кырааската суох чүмэчилэри оҥорон, нэһилиэнньэҕэ атыылыыллар. Бу оҕолор илиилэрин сылааһын илдьэ сылдьар, тупсаҕай көрүҥнээх чүмэчилэри, бэлэхтэри олохтоохтор сөбүлээн, хамаҕатык атыылаһаллар.
Оттон оҕолор бэйэ оҥоһугун оҥорон таһааран, атыылыырга, былаанныырга, толкуйдуурга, сөпкө дьаһанарга үөрэнэллэр. Урбаанньыт киһи дьыалата аан бастаан кини толкуйуттан, өйүттэн-санаатыттан саҕаланара диэн кырдьык. Оҕолорбут чыҥха атын толкуйдаах, дьоҕурдаах дьон буола улаатыахтара.
Ангелина Васильева, “Саха сирэ” хаһыат, edersaas.ru