Ньурбаҕа быйылгы сыл Экология сылынан биллэриллибитэ.
Сыл чэрчитинэн куоракка үгүс үлэ барар. Ол курдук, өр сылларга кыһалҕаны үөскэппит ол-бу араас тимири ыраастааһын боппуруоһа быһаарылынна. Куорат иһигэр массыына эргэ куусаптара, ыһылла сытар араас тимирдэр айылҕаны киртитэллэр, куорат көстүүтүн буортулууллар. Ньурбалар куораты ырааһырдыы чэрчитинэн куорат дьаһалтата уонна СЭГХ туһата суох тимир тобохторун пресстииргэ анал тэрили ылан, үлэтин саҕалаата.
Бу сонун сүүрээн өрөспүүбүлүкэҕэ муниципальнай тэриллиилэр үлэлэригэр бастакы хараҥаччынан буолла. Көһө сылдьар кыахтаах тэрили куорат дьаһалтата 3 мөлүйүөн солк. кэриҥэ харчыга атыыласпыта. Татарстантан Ньурбаҕа тиийэ массыынанан тиэллэн, олус наадалаах тэрил бэс ыйыгар кэлбитэ. Билигин быраҕыллыбыт тимир тобохторун СЭГХ баазатыгар тиэйэн аҕалан, эрбэтэн баран пресстии сылдьаллар. Бастакынан Ньурба пордун таһыгар уонна Ыраах Убайааҥҥа мунньуллубут тимири бүтэрэр сорук ылынан үлэлииллэр.
Күҥҥэ ортотунан 3-4 тиэхиньикэ куусабын пресскэ батар гына кэрчиктээн, 130 киилэҕэ тиийэ блоктары пресстээн таһаараллар. СЭГХ үлэһиттэрэ үлэ саҥа көрүҥүн толору баһылаабыттар. Куорат баһылыга Александр Иванов этэринэн, Ньурба куоракка ааспыт сыллар тухары мунньуллубут, туһатыттан тахсыбыт массыыналар куусаптарын, араас тимири ортотунан 5 сылынан ыраастыыр сорук ылыммыттар. Бу туһунан Ньурба куорат дьаһалтатын инстаграмыгар пресс-киин иһитиннэрэр.
Елена ПОТОЦКАЯ, «Саха сирэ» хаһыат, edersaas.ru
Хаартыска: Ньурба куоратын дьаһалтатын инстаграмыттан.