Ньурба улууһун Акана сэлиэнньэтигэр «Якутский скот» хааһына тэрилтэтин филиалыгар саха ынаҕа төрөөтө. Бу туһунан, улуус дьаһалтатын пресс-сулууспата иһитиннэрэр.
edersaas.ru
Аканаҕа саха сүөһүлэрин ааспыт сыл күһүн аҕалбыттара. Оттон 100 төбө батар хотонун үөрүүлээх аһыллыыта ахсынньыга ыытыллыбыта. Төрүт сүөһүлэри Амматтан, Намтан уонна Горнайтан аҕалбыттара.
Санатар буоллахха, ааспыт сылга маннык хотоннор Нам улууһугар Таастаахха (150 төбөҕө), Мииринэй оройуонугар Сүлдьүкээргэ (200 төбө) үлэҕэ киирбиттэрэ. Маны таһынан, улахан комплекстар Горнайга, Үөһээ Бүлүүгэ, Амма улууһугар тутуллаллара былааннанар.
Саха сүөһүтүн өрөспүүбүлүкэ 14 оройуонугар, 20 нэһилиэгэр, ону таһынан, Дьокуускайга туталлар. Саамай элбэх сүөһү Эбээн Бытантайга турар. СӨ Бырабыыталыстыбатын сорудаҕынан, 2024 сылга диэри саха сүөһүтүн ахсаана 3 тыһыынча төбөҕө тиийиэхтээх.
Виктория Бястинова