Маны аах Тыа хаһаайыстыбата

Ньурбаҕа саха сүөһүтүгэр саҥа сайылык тутулунна

«Саха сүөһүтэ» генопуонда тэрилтэтин Чкаловтааҕы салаатыгар саҥа сайылык тутуллан үлэҕэ киирдэ.

«Саха ынаҕын үүтэ-этэ кыра» диэн, 1960-с сыллартан симменталь уонна холмогор боруода сүөһүлэр маассабайдык аҕалыллыбыттара. Ол түмүгэр, саха төрүт сүөһүтүн ахсаана быста аҕыйаан баран, ааспыт сүүрбэччэ сыл устата ыытыллыбыт былааннаах үлэ түмүгэр эстэр кирбииттэн таһаарыллан эрэр. Төрүт сүөһүбүтүн ууһатан иитэр үлэни сэттэ салаалаах «Саха сүөһүтэ» генопуонда тэрилтэтэ сүрүннүүр.

Тэрилтэ материальнай-тиэхэньиичэскэй баазаны хаҥатыыга күүскэ үлэлиир. Ол курдук, икки сыллааҕыта Эбээн Бытантайга, былырыын Нам улууһун Таастааҕар, Мииринэй Сүлдьүкээригэр аныгы ирдэбилгэ эппиэттиир  комплекстар тутуллубуттара.

Ньурба улууһун Акана нэһилиэгин Чкалов учаастагар баар саха сүөһүтүн иитэр дьоҕус хаһаайыстыбаны ааспыт өттүгэр улуус бэйэтэ көрөн олорбут буоллаҕына, былырыҥҥыттан бу хаһаайыстыба генопуонда тэрилтэтин сэттис салаата буолбута. Манна Амма Болугуруттан, Нам Таастаҕыттан уонна Горнай Маҕараһыттан 50 ынах сүөһү эбии аҕалылыллыбыта, итиэннэ 100 сүөһүгэ анаммыт кыстык хотон тутуллубута. Күн бүгүн хаһаайыстыба барыта 95 ынах сүөһүлээх, ол иһигэр 20 ньирэйдээх.

Быйыл сайын хаһаайыстыба Куртах диэн сиргэ типовой сайылыгы, үлэһиттэр олорор дьиэлэрин тутта. Онон, Ньурбаҕа төрүт сүөһүнү иитии баазата олохтоохтук оҥоһулунна. Саҥа сайылыгы арыйыы сиэрэ-туома балаҕан ыйын 15 күнүгэр тэрилиннэ.

Раиса Сибирякова.

1
0
Telegram @edersaas20