Бу күннэргэ Ньурба куоратыгар «Сахафармация» саҥа аптеката арылынна.
edersaas.ru
Ньурба улууһун дьаһалтатын пресс-киинин кэрэспэндьиэнэ Геннадий Антонов саҥа аптека туһунан маннык кэпсээтэ:
-“Сахафармация” судаарыстыбаннай тэрилтэ өрөспүүбүлүкэҕэ биир бөдөҥ аптека ситиминэн буолар. Улуус дьаһалтата «Сахафармация” салалтатын кытта ааспыт сылтан кэпсэтии ыыппытын түмүгэр, билиҥҥи уустук кэмҥэ, олус туһалаах саҥа эмп тэрилтэтэ арылынна. Аптека Ньурба куоратын киин уулуссаларын быһа охсуһууларыгар турар буолан, нэһилиэнньэ сырыытыгар олус табыгастаах.
«Сахафармация» 12 №-дээх саҥа аптекатын сэбиэдиссэйинэн анаммыт, бу эйгэҕэ өр сылларга үлэлээбит уопуттаах фармацевт Наталья Харакова:
-Сүрүн сыалбытынан нэһилиэктэри эминэн уонна чэпчэтиинэн туһанар нэһилиэнньэ араҥатын босхо эминэн хааччыйыы буолар. Үлэһиттэр үспүт, икки аптечнай пууннаахпыт. Киин балыыһа салалтата эбии хос биэрэн, инбэлииттэри уонна тыыл бэтэрээннэрин эминэн хааччыйар иккис пуун поликлиника дьиэтигэр арылынна. Аптекабыт арыллан, кэлбит эмпитин атыылыы турабыт. Кыһыҥҥы суол сабыллыан иннинэ, нэһилиэктэртэн сайаапка хомуйан, туһааннаах эмтэри сакаастаабыппыт. Кэлбит эмп-томп нэһилиэктэринэн тыырыллар. Аныгы олох сиэринэн, нэһилиэнньэни кытта хардарыта сибээс олохтоон, бары социальнай ситимнэринэн үлэлиир былааннаахпыт.
Ньургуйаана Иванова, «Саха сирэ» хаһыат, edersaas.ru
Хаартыска Ньурба улууһун пресс-кииниттэн