Ньурбаҕа полиция подполковнигын саанан ытан өлөрбүт киһиэхэ бириигэбэр таҕыста
Бу өлөрүү туһунан сайтпытыгар 2018 сыл балаҕан ыйын 21 күнүгэр «Ньурбаҕа полиция подполковнигын саанан ытан өлөрдүлэр» диэн иһитиннэриигэ суруйбуппут. Ол кэнниттэн балаҕан ыйын 27 күнүгэр «Ыар буруйдаах сокуонунан кытаанахтык эппиэттиирин модьуйабыт!» диэн өлүөхсүт чугас дьонун суруга бэчээттэммитэ. Бу дыала суукка көрүллэн, бириигэбэр тахсыбытын туһунан РФ Силиэстийэлиир кэмитиэтин Саха сиринээҕи управлениета иһитиннэрдэ.
Быһылаан тахсаатын, Ньурба улууһугар ис дьыала уорганнарын астаапкаҕа сылдьар подполковнигын саанан ытан өлөрбүттэрин туһунан иһитиннэрии бастаан сонуннары киэҥник тарҕатар ситимнэргэ тахсыбыта.
Оччолорго бастакы иһитиннэриинэн, 50 саастаах өлүөхсүт Николай Акимович Акимовы бэйэтин саатыттан ыппыт курдуктар диэн этэ. Уорбаланааччы урут хаста да сууттана сылдьыбыт киһи диэн биллибитэ. Уонна бу утарыта «кытыллар» өрүттэрэ бултуу сылдьан алҕас көрсүбүттэр диэн буолбута.
Өлөрүүгэ уорбаланааччыны — Ньурба куоратыттан төрүттээх 48 саастаах рецидивиһи — сол күн тутан хаайбыттара.
Бу чахчынан «киһини соруйан өлөрүү» ыстатыйанан холуобунай дьыала тэриллибитэ.
Оттон суут туох диэн быһаарда?
Суут быһаарбытынан, 2018 сыл балаҕан ыйын 19 күнүгэр, буруйданааччы Ньурба улууһун Күндээдэ сэлиэнньэтин чугаһыгар Бэс-Күөл диэн сиргэ балыктыы сылдьыбыт. Онно эмсэҕэлээччи бултуу кэлбит.
Онтон бииргэ арыгы иһэ олорон, кыыһырсыбыттар, устунан охсуһан турбуттар. Охсуһуу кэмигэр буруйданааччы кураанах бытыылканы ылан, эмсэҕэлээччини өйүн сүтэриэр диэри төбөҕө охсубут.
Ол кэнниттэн буруйданааччы эмсэҕэлээччи саатын ылан, чугастан туран, охтубут киһини хаҥас санныга уонна төбөҕө иккитэ ытан, миэстэтигэр өлөрбүт. Ол өлөрөн баран, өлүөхсүт саатын уонна ботуруоннарын уорбут.
Бу урут массыынаны күрэтиигэ уонна уорууга түбэһэн, хаста да сууттана сылдьыбыт киһийдэҕи «сылааһына» туппуттар.
Силиэстийэ да, суут да кэмигэр буруйун толору билиммит.
Суут кинини икки ыстатыйанан — киһини соруйан өлөрүүгэ уонна сэби-сэбиргэли уорууга — буруйдааҕынан билинэн, 13 сылга кытаанах эрэсиимнээх холуонньаҕа көҥүлү быһарга уурбут.
Хаартыскаҕа: өлүөхсүт Николай Акимов.