Тыа хаһаайыстыбатын министиэристибэтэ, Урбаан, эргиэн уонна туризм министиэристибэтэ Ньруба улууһун дьаһалтатын кытары Бүлүү эҥээр улуустар урбаанньыттарыгар анаан форум ыыттылар.
edersaas.ru.
Онно алта былаһаакканан киэҥ кэпсэтии тэрилиннэ. Форум кыттыылаахтара бастатан туран, Ньурба улууһун дьаһалтата урбааны өйөөһүн бырагырааматынан ыытар үлэтин-хамнаһын билистилэр, оскуолаҕа бизнес-инкубатордары сайыннарыы, урбаан эйгэтигэр судаарыстыбаттан туох көмө уонна хайдах быһыылаахтык оҥоһулларын, сокуонунан араҥаччыланарын тустарынан кэпсэттилэр, оттон бааһынай хаһаайыстыба тэринэн үлэлиэн баҕарар дьон сэминээргэ үөрэннилэр.
Саха судаарыстыбаннай тыа хаһаайыстыбатын академиятын учуонайдара “Мүөттээх ыҥырыыны иитии төрүттэрэ. Үлэни хайдах саҕалыахха?”, “Олохтоох сырьеттан саҥа бородууксуйаны оҥоруу”, «Кондитерскай дьыала” диэн тиэмэлэринэн маастар-кылаастары оҥордулар. Олохтоох урбаанньыттар итиэннэ оскуолатааҕы бизнес-инкубатордар резиденнэрэ “Ньурбаҕа оҥоһулунна” диэн брендинэн бэйэлэрин бородууксуйаларын быыстапкалаатылар.
Форум түмүгэр бастыҥ үлэлээхтэри чиэстээһин буолла. Улуус баһылыга Алексей Иннокентьев 500 тыһ. солк. граны Н.И.Прокопьев аатынан Хатыы орто оскуолатыгар бизнес-инкубаторы тэриниигэ туттарда.
Раиса Сибирякова, «Саха сирэ» хаһыат, edersaas.ru