Ньурба Хаҥалаһыгар эдьиийдии балыс уонна убайдыы быраат игирэлэр холбоһон олороллор. Олоххо араас дьикти-дьиибэ түгэн олус элбэх. Марина уонна Галина Алексеева диэн икки игирэ кыыс игирэ уолаттарга кэргэн тахсыбыттарын туһунан кэпсииргэ сананныбыт. Кинилэр игирэ уолаттарга кэргэн тахсыбыттарын ааһан, араспаанньалара уонна аҕаларын аата эмиэ биир эбит. Уолаттар Виктор уонна Борис Алексеевтар. Онон ааттарыгар икки өттүттэн туох да уларыйыы тахсыбатах. Марина Викторга, оттон Галина Бориска кэргэн тахсыбыттар. Станислав ИОВЛЕВ, www.edersaas.ru, «Саха сирэ» хаһыат.
Кинилэр билигин Ньурба улууһун Хаҥалас нэһилиэгэр олороллор. Мариналаах Галина бииргэ төрөөбүттэр иккиэлэр эрэ. Оттон Бористаах Виктор бииргэ төрөөбүт онуолар! Кинилэргэ Зина уонна Светлана диэн эмиэ игирэ кыргыттар бааллар эбит. Онон игирэ буолуу кинилэр хааннарыгар баар буолуон сөп. Мариналаах Виктор түөрт оҕолоохтор: икки кыыс, икки уол. Оттон Бористах Галина биэс оҕолоохтор: түөрт уол, биир кыыс. Биир да игирэ суох. Сиэннэригэр игирэлэр эмиэ суохтар.
Галиналаах Марина Ньурба Дьаархан нэһилиэгиттэн төрүттээхтэр. Хаҥалас нэһилиэгэр маҕаһыыҥҥа атыыһыттыы кэлбиттэр. Ол кэмҥэ Виктор ойуурга үлэлээбит, оттон Борис хачыгаардыы сылдьыбыттар. Биир күн кыргыттар Дьаархаҥҥа тахсаары Бористааҕы суоппардыылларыгар көрдөспүттэр. Кыргыттарга эһэлэрин (Аҕа дойду сэриитин бэтэрээнэ) “Москвич” массыыната баар эбит. Бэйэлэрэ сатаан ыыппат буолан Бористааҕы көрдөспүттэр. Маҥнайгы билсиһиилэрэ итинник ааспыт. Онтон, сылы кыайбат кэм ааспытын кэннэ, 1983 сыл сэтинньи 4 күнүгэр төрдүөн биир күн ыал буолбуттар.
Билигин Мариналаах Галина 57 саастаахтар. Оттон Бористаах Виктор 59-таахтар. Мариналаах Галина өрүү бииргэ сылдьыбыт буоланнар, тэйсэр түгэннэригэр олус суохтаһаллар үһү. Виктордаах Борис кинилэри тас дьүһүннэриттэн билигин даҕаны араарбаттар, олус майгыннаһабыт диэн күлэн кэпсээтилэр. Оттон уолаттар төттөрүтүн бэйэ-бэйэлэриттэн уратылар эбит. Борис Виктордааҕар уҥуоҕунан арыый үрдүк үһү.
Игирэ буолан төрөөбүт, буолаары буолан игирэлэргэ кэргэн тахсыбыт кыргыттар кылгастык итинник кэпсээтилэр. Марина игирэлээх олус үчүгэй диэн эттэ. Өр кэмҥэ көрсүбэтэхтэринэ олус суохтаһар буолан, иккиэн Хаҥалас нэһилиэгэр атыыһыттыы тиийбиттэр. Төрөппүттэрэ игирэ уолаттарга кэргэн тахсан эрэллэриттэн улаханнык соһуйбатахтар. Саамай сүрүнэ, үчүгэй эрэ уолаттарга таҕыстыннар диэн икки мааны кыыстарын туһугар үөрбүттэр.
Станислав ИОВЛЕВ.
Хаартыскаҕа:
1. Марина Николаевна, Виктор Николаевич Алексеевтар.
2. Галина Николаевна, Борис Николаевич Алексеевтар.