Ньурба улууһугар олохтоох бородууксуйаттан дьуот эбиликтээх, 3,2% cыалаах үүтү оҥорон саҕалаатылар. Ньурба улууһун дьаһалтатын сакааһынан, Арктикатааҕы агротехнологическай университет ас-үөл технологиятын уонна индустриятын кафедрата дьуоттаах белогунан байытыллыбыт, пастеризацияламмыт үүтү оҥоруу технологиятын бэлэмнээтэ. Бу нэһилиэнньэҕэ дьуот тиийбэт буолуутун кыһалҕатын тохтотуохтаах.
Бу саҥа бородуукта Ньурба улууһун “Влада” ТХПХ үрдүк хаачыстыбалаах үүт бородууксуйатыттан оҥоһуллар. Бары лабораторнай чинчийиини ааһан, Дьокуускайдааҕы сертификация уорганын декларациятын ылбыта диэн ulus.media иһитиннэрэр.
Хоту олорор дьоҥҥо дьуот тиийбэтэ биллэр. Ол ордук улаатан эрэр оҕолорго уонна хат дьахталларга, эмтэрэр ийэлэргэ улахан охсуулаах. Маныаха дьуоттаах туус уонна анал эмп көмөлөһөр. Оттон маннык дьуоттаах үүтү иһэн, эми испэккэ эрэ, организммытыгар дьуот тиийбэт кыһалҕатын сабыахпытын сөп эбит. Кэнники кэмҥэ дьон доруобуйатын туругар кыһаллара, доруобуйаҕа маннык туһалаах, хаачыстыбалаах ас-үөл баар буолан иһэрэ үөрдэр.
Ангелина Васильева, “Саха сирэ” хаһыат, edersaas.ru
Хаартыска: sakha.gov.ru