Аны биэс сылынан, 2027 сылга, Саха сирин норуоттарын IX спортивнай оонньууларын көрсө Ньурбаҕа 3 тыһ көрөөччү киирэр стадион уонна бассейннаах спортивнай комплекс тутуллуоҕа.
Бу туһунан Ил Дархан Айсен Николаев уонна Ньурба улууһун баһылыга Алексей Иннокентьев көрсөн кэпсэттилэр. Баараҕай объектары «Демография» национальнай бырайыагын чэрчитинэн «Спорт – норма жизни» бырагыраама федеральнай үбүнэн тутуохтара. Баһылык эппитинэн, бу бассейннаах спортивнай тутуу бырайыактыыр-симиэтэлиир докумуоннарын оҥоһулла сылдьар, стадион бырайыага номнуо бүтэн, судаарыстыбаннай экспертизаны ааспыт.
Быйыл САССР 100 сылыгар Ньурбаҕа икки оскуола мэндэйиэҕэ. Ол курдук Чаппандаҕа 100/50 миэстэлээх оскуола-саад, Күндэйэҕэ 176 миэстэлээх оскуола арыллыаҕа. Судаарыстыбаннас күнүгэр Ньурба куоратыгар 360 оҕо үөрэнэр оскуола бастакы сваятын үөрүүлээх быһыыга-майгыга түһэриэхтэрэ. Оскуола тутуутун муниципальнай оройуон уонна «АЛРОСА” АХ үбүлүөхтэрэ.
Алексей Иннокентьев үөрэ-көтө кэпсээбитинэн, быйыл Ньурбатааҕы судаарыстыбаннай тыйаатырын дьиэтэ эмиэ арыллыаҕа. Ил Дархан сорудаҕынан, ити тутуу атырдьах ыйыгар үлэҕэ киириэхтээх.
СӨ Ил Дарханын уонна Бырабыыталыстыбатын Пресс-сулууспата
Андрей Сорокин хаартыската, СИА