Ааспыт нэдиэлэҕэ Ылдьыын ардаҕа түһэн, ойуур баһаарын умуруорарга айылҕа бэйэтэ көмөлөстө. Ньурбаҕа от ыйын бүтүүтэ балаһыанньа хайдаҕын улуус баһылыгын I солбуйааччы Артур Яковлев кэпсээтэ:
— Ойуур баһаардара туруохтарыттан, Ньурбаҕа 46 баһаар бэлиэтэммитэ. Онтон 27 хонтуруолга ылылынна, уот турбут 9 сирин сирдээҕи сулууспа булбута, 9-һу салгынтан көрбүттэрэ. От ыйын 30 күнүнээҕи туругунан, 19 баһаары умуруордубут. СӨ Баһаартан сэрэхтээх буоларга, ыксаллаах быһыыны-майгыны сэрэтэргэ, ону туоратарга хамыыһыйата 24 баһаар нэһилиэккэ уонна экэниэмикэ эбийиэктэригэр кутталы үөскэппэт диэн быһаарда.
Ойуурга IV кылаастаах баһаар куттала үөскээн, нэһилиэктэри көмүскүүргэ эбии миэрэ ыларга 2019 сыл от ыйын 12 күнүттэн Ньурба улууһугар баһаары утары охсуһуу эрэсиимэ биллэрилиннэ.
Күн бүгүн сороҕо умуруоруллубутун кэнниттэн, улууска өссө да ойуур 13 баһаара баара бэлиэтэннэ, итинтэн 4 уоту умуруорар үлэ ыытыллар.
Хорулаҕа 35 га сиргэ уот турда, Сайылык нэһилиэгэр диэри 15 килэмиэтир. Уоту умуруорарга 48 киһи, 6 тиэхиньикэ таҕыста.
Чуукаар диэки Улгумдаҕа 10 га сиргэ уот турда, Чуукаарга диэри 12 килэмиэтир. Манна 66 киһи, 9 тиэхиньикэ уоту умуруорарга үлэлиир.
Күндээдэ туһаайыытынан Кугдаарга 5 га сиргэ уот турда, ону умуруорарга 10 киһи, 2 тиэхиньикэ таҕыста. Күндээдэҕэ диэри 19 килэмиэтир.
Түүкээҥҥэ 5 га сири уот ылла, Чкалов нэһилиэгэр диэри 17,8 килэмиэтир. Уоту умуруорарга 12 киһи үлэлиир.
Тыал хайысхата уларыйа сылдьар буолан, улууска хойуу буруо суох.
Марианна Тыртыкова, «Саха сирэ» хаһыат, edersaas.ru