Бэҕэһээ, кулун тутар 11 күнүгэр, Ньурбаҕа 280 миэстэлээх оҕо уһуйаана аанын аста. Бу “Демография” национальнай бырайыак чэрчитинэн тутулунна.
edersaas.ru
«Кэскил» уһуйаан сэбиэдиссэйэ Оксана Самсонова өрөгөйдөөх тэрээһин кэмигэр уһуйаан күлүүһүн тутта, ааны арыйар лиэнтэни быһан саҥа дьиэ үлэҕэ киириитин бэлиэтээтилэр.
Оҕолору уонна төрөппүттэри күүтүлээх тутуу үлэҕэ киирбитинэн эҕэрдэлии СӨ Бырабыыталыстыбатын Бэрэссэдээтэлин солбуйааччы Сергей Местников, Ньурба улууһун баһылыга Алексей Иннокентьев, дьокуттааттар оройуоннааҕы сэбиэттэрин бэрэссэдээтэлэ Сергей Евсеев, Ньурба куорат баһылыга Александр Иванов, «Ярус» ХЭТ тутуу хампаанньатын дириэктэрэ Степан Петров тиийбиттэр.
Үөрүүлээх түгэн ыалдьыттарыгар анаан уһуйаан иитиллээччилэрин уонна үлэһиттэрин үлэлэрин быыстапката тэрилиннэ. Оҕолор «Уйгулаан, уһуйаан уйата» диэн ырыаны толорон иһитиннэрдилэр.
Үс мэндиэмэннээх саҥа дьиэ оҕону көрүү-истии уонна иитии үлэтигэр аныгы усулуобуйаҕа эппиэттиир. Киэҥ сырдык хостор, муусука уонна физкультура саалалара, бассейн, эбии үөрэхтээһин, психолог уонна логопед кабинеттара бааллар.
«Саха сирэ» хаһыат, edersaas.ru