Ньурбаҕа өрөспүүбүлүкэҕэ сүөһү аһылыгын бэлэмнээһин хампаанньатын хаамыытын туһунан улахан сүбэ мунньах ыытылынна.
Саха сирин баһылыга Айсен Николаев Үөһээ Бүлүү уонна Ньурба оройуоннарыгар оробуочай сырыыта өрөспүүбүлүкэҕэ сүөһү аһылыгын бэлэмнээһин хампаанньатын хаамыытын туһунан сүбэ мунньаҕынан түмүктэннэ. Онно өрөспүүбүлүкэ миниистирдэрин кэбиниэтин уонна муниципальнай тэриллиилэр бэрэстэбиитэллэрэ кытыннылар.
Сүрүн дакылааты өрөспүүбүлүкэ тыатын хаһаайыстыбатын миниистирэ Александр Атласов оҥордо. Кини этэринэн, быйыл сайын эрэгийиэн 479 тыһыынча туонна оту, 24 тыһыынча туонна сиилэһи уонна 14 туонна сенаһы бэлэмниэхтээх. Сүөһү аһылыгын бэлэмнээһин балаҕан ыйын ортотугар түмүктэниэхтээх.
Айылҕа уустук усулуобуйатытан сибээстээн киин улуустарга бурдук, биир сыллаах сүөһү аһылыгын култууратын үүнүүтэ мөлтөх. Мэҥэ Хаҥаласка, Намҥа, Уус Алдаҥҥа от тиийбэт кыһалҕата туруон сөп. Ол эрээри уустук балаһыанньа ойуур уотуттан ыксаллаах балаһыанньа биллэриллибит Дьааҥы улууһугар күүтүллэр. Былааннаммыт 11 тыһыынча туоннаттан оройуон 4,4 тыһыынча туоннаны эрэ бэлэмниир кыахтаах.
“Өрөспүүбүлүкэ тыатын хаһаайыстыбатын министиэристибэтэ улууска 12,5 мөлүйүөнү мобильнай биригээдэлэринэн оту бэлэмнээһиҥҥэ уонна кыстык бастакы аҥаарыгар улуус иһиттэн тиэйиигэ биэриэҕэ”, — диэтэ миниистир.
Эмсэҕэлээбит улуустарга Бүлүү, Үөһээ Бүлүү, Ньурба, Кэбээйи, Өлүөхүмэ, Хаҥалас оройуоннара от атыылыахтара.
Мунньах түмүгүнэн Айсен Николаев тыа хаһаайыстыбатын үлэһиттэригэр от тиийбэт оройуоннарыгар саппаас фонданы тэрийэргэ сорудах биэрдэ. Ньурба оройуонугар Саха сирин баһылыга Ньурбатааҕы көтөрү иитэр фабрикаҕа сылдьан, килиэккэ батареяларын алдьаныытыттан тахсыбыт саахал кэнниттэн хайдах үлэлии олороллорун көрдө. Николаев Ньурбаттан 4 килэмиэтир тэйиччи сытар Куочайга “Ньурба-Агро” массыына-технологическай ыстаансыйатын отчуттарын кытта көрүстэ.
Маны сэргэ Бүлүү умнаһынааҕы оройуоннарга өрөспүүбүлүкэ баһылыгар мелиорация тиһигин туһунан кэпсээтилэр. Тамалакаан уонна Харбалаах нэһилиэктэрин сирдэригэр-уоттарыгар баар Тэҥэлилээх диэн сиргэ шлюз-регуляторы уонна Хороҕо Дьүгэлээх үрэххэ шлюз-регуляторы көрдө.
Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын пресс-сулууспата.