Дойдубут бэрэсидьиэнэ Владимир Путин нэһилиэнньэ пандемияттан улахан оҕустарыыта суох тахсарын туһугар чөлгө түһүү саҥа стандартарын олохтообута.
Оттон «Ньурба оройуона» МТ дьаһалтата коронавирус дьаҥа бүрүүкээтин кытта олохтоох дьон сэмэй дохуоттаах араҥатыгар, социальнай көмүскэл быһыытынан «Күндээдэ» агрофирмалыын сүбэлэһэн, өйөбүл быһыытынан 100 төбө саҥа төрүөх ньирэйи босхо түҥэтэргэ быһаарыы ылыммыттара. Бу күннэргэ сорох нэһилиэктэргэ ньирэйдэр хайыы үйэ тиийдилэр. Онон үөрүү-көтүү үксээтэ.
Иван Иванов, түөрт оҕолоох Акана олохтооҕо:
— Элбэх оҕолоох буоламмыт хайдах гынан сүөһүлэнэбит дии сырыттахпытына, дьаһалта сайаапкалары хомуйан, хамыыһыйаны ааһаммыт буор босхо ньирэйдэннибит. Ньирэйбитин сүөһү төрдө оҥоруохпут. Сүөһүтэ суох тыаҕа олорор уустук. Дьинэ, ис санаабытыгар билиҥҥи кэмҥэ хайдах сүөһүнү босхо түҥэтиэхтэрэй диэн сөхпүппүт баара кыларыйар кырдьык буолла. Ол иһин оройуон салалтатыгар, «Күндээдэ» агрофирмаҕа маннык улахан өйөбүл-көмө иһин махтанабыт.
Максим Нестерович, биэс оҕолоох Үөдэй ыалын аҕа баһылыга:
— «Ойуурдаах куобах охтубат, дьонноох киһи тутайбат» диэн өс хоһоонун эт бэйэбитинэн биллибит. Мин санаабар, Ньурба оройуонун бүддьүөтэ, «Күндээдэ» агрофирма да үбэ-харчыта байҕалга тэҥнээх буолбатаҕа чуолкай. Дьаҥынан сылтаан былааннамматах ороскуот бөҕө тахсыбытын үрдүнэн салалта боростуой үлэһит дьоҥҥо бу курдук көмө оҥорбута, илиитин утары ууммута өрөспүүбүлүкэҕэ аҕыйах буолуон сөп . Биһиэхэ биэс ыал ньирэйдэннэ, идэһэҕэ туттубаппыт, сүөһү гынабыт дииллэр. Биир өттүнэн көрдөххө, аны атын хааннаах сүөһү кэлэн хороҕор муостаахтарбыт туруктара, боруодалара тупсуоҕа.
Елена Саввинова, Хатыы нэһилиэгин дьаһалтатын үлэһитэ:
— Биһиэхэ аҕыс сайаапка киирбититтэн, хамыыһыйа биэс ыалы аһардыбыта. Нэһилиэнньэҕэ биһиэхэ биэрбэтилэр диэн хос саҥа суох, төттөрүтүн, маннык ыгым күннэргэ 100 төбө ньирэйи кэскиллээҕи эрэ көрөр салалта босхо биэрэр диэн толкуйдаахтар. Онон хатыылар ааттарыттан барҕа махтал буоллун. Биэс ыалбыт бары элбэх оҕолоохтор, ньирэйдэри улаатыннаран сүөһү баайы тэнитиэхпит дэһэллэр.
Лилия Алексеева, Таркаайы нэһилиэгин дьаһалтатын тыа хаһаайыстыбатыгар исписэлиис:
— Хатыҥ Сыһыылар, Киирэптэр биэс ньирэйгэ тиксэннэр үөрүүлэрэ муҥура суох. Үөрүөхпүт иһин, сүөһү ииттиэн баҕалаахтарга эдэрдэр элбээн иһэллэр, урут наар саастаах өттө маннык баҕалаах этэ. Мин толкуйдуурбунан, оройуоҥҥа сүөһү төбөтүн ахсаана түспэтигэр оройуон салалтата, «Күндээдэ» агрофирма дьоһун олугу уурдулар. Мантан тирэнэн эдэр ыаллар сүөһүлэрин элбэтэ олоруохтара, ол да иһин биһиги дьоммут бу көмөнү-өйөбүлү олус сыаналаатылар уонна салалта үлэтигэр ситиһиилэри баҕардылар.
edersaas.ru саайтка анаан
Ньурбаттан Лена Петрова.