Бүгүн Ньурба улууһугар бэрт долгутуулаах уонна үөрүүлээх күн буолла! Ол курдук, 17 эдэр ыалга дьиэ тутталларыгар уонна олорор усулуобуйаларын тупсаралларыгар диэн ортотунан 1 мөлүйүөн солкуобай суумалаах сэртипикээттэри туттардылар.
Дойдуга буола турар быһыыны-майгыны учуоттаан, сэртипикээттэри туттарыы онлайн ыытылынна. Улуус баһылыга Алексей Иннокентьев дьоллоох дьиэ кэргэттэри сааскы бырааһынньыктарынан эҕэрдэлээтэ, харыстана сылдьалларыгар сүбэлээтэ уонна үөрүүлээх быһыыга-майгыга сэртипикээттэри туттартаата.
Эдэр ыаллар улуус дьаһалтатыгар, күүс-көмө, сүбэ-ама буолбут исписэлиистэргэ ис сүрэхтэриттэн махтаннылар.
Лена, Николай Павловтар:
— Биһиги Түмүк нэһилиэгэр үлэлии сылдьан 2013 сыллаахха уочаракка турбуппут. Бу субсидияҕа тиксибиппититтэн олус үөрдүбүт. Ийэбит уһуйааҥҥа иитээччинэн, аҕабыт ОДьКХ суоппарынан үлэлиибит, кыыс оҕолоохпут – уһуйаан иитиллээччитэ. Биһиги чааһынай дьиэ туттар былааннаахпыт, онно оруобуна анаабыт курдук олус табыгастаах көмө буолла.
Ньурбабыт баһылыга Алексей Михайлович эдэр ыаллары, уопсайынан, эдэр дьону наар өйүүр. Түгэнинэн туһанан, биһиги дьиэ кэргэн аатыттан улахан махталбытын тиэрдэбит.
Сэртипикээккэ тиксибит 17 ыал 2012-2013 сыллартан уочаракка туран, туһааннаах докумуоннарын кэмигэр тутан, күүтүүлээх түгэннэрэ, дьэ тосхойдо.
Бу бырагыраамаҕа анаан оройуон бүддьүөтүттэн 10 мөлүйүөн солкуобайтан тахса, өрөспүүбүлүкэттэн 600 тыһыынча солкуобайтан тахса, федеральнай үптэн 7 мөлүйүөн солкуобай кэриҥэ — барыта холбоон 18 мөлүйүөн солкуобайтан тахса суума көрүллэн, 17 эдэр ыал үөрүүлэрэ муҥура суох.
Бу сэртипикээт көмөтүнэн эдэр ыал өрсөпүүбүлүкэ хайа баҕарар муннугар туһаныан сөп.
edersaas.ru саайтка анаан
Ньурбаттан Лена Петрова,
сүрүн хаартыскаҕа — Павловтар дьиэ кэргэн.