Бүгүн, бэс ыйын 12 күнүгэр, 10:00 чааска Саха сирин Ил Дархана Айсен Николаев эрэгийиэҥҥэ коронавирус балаһыанньатын туһунан брифинг ыытта.
Ил Дархан Айсен Николаев:
— Саха сиригэр дьаҥ туруоҕуттан 2898 киһи ыарыыга сутулунна. Оттон бүтэһик сууккаҕа 76 киһи ыарыйда. Ааспыт күннэрдээҕэр эбилиннэ. Ол эрээри, Дьокуускайга ыарыы аччаабыта бэлиэтэнэр, 54 киһи эбии ыарыйда. Мииринэйгэ тоҕус киһи, Ньурбаҕа алта киһи ыалдьан, бу икки улууска ыарыыны бохсууга үлэлэр ыытыллаллар. Хантаактаахтар быһаарыллыбыттара, анаалыс ыла сылдьаллар.
Өрөспүүбүлүкэ үрдүнэн 17 киһи ыарахан туруктаах, онтон үс киһи ИВЛ-аппараакка холбонон сытар.
Бэнидиэнньиктэн, бэс ыйын 15 күнүттэн, хааччахтааһын миэрэлэриттэн тахсыы бастакы түһүмэҕэ ыытыллыаҕа, тустаах ыйаахха илии баттаабытым. Хааччахтааһын баар нэһилиэнньэлээх пууннарга санитарнай нуормалары тутуһан, парикмахерскайдар, кэрэ буолуу, спа солуоннара үлэлэрин саҕалыахтара. Маны сэргэ олорор дьиэлэр бастакы этээстэригэр баар маҕаһыыннар үлэлиэхтэрэ.
Иккис түһүмэх бэс ыйын 22 күнүгэр ыытыллыан сөп. Ол эрээри, маасканы кэтии эрэсиимэ бүппэт, тастан кэлбит дьон 14 күннээх хааччахтааһыны эбэһээт тутуһуохтара.
Бэйэбит уонна чугас дьоммут доруобуйатыгар эппиэтинэстээхтик сыһыаннаһыахха.
edersaas.ru