Ньурба улууһун баһылыга ыйдааҕы хамнаһын аҥаарын бэтэрээннэргэ көмөҕө анаата

Ньурба улууһун баһылыга Алексей Иннокентьев кулун тутар ыйдааҕы хамнаһын аҥаарын тыыл бэтэрээннэригэр мэдиссиинискэй мааскалары уонна дезинфекциялыыр сириэстибэлэри атыылаһарга  биэрдэ.

Бу туһунан Ньурба улууһун дьаһалтатын пресс-киинин кэрэспэдьиэнэ  Геннадий Антонов  суруйар:

«Улуус дьаһалтатын бүгүҥҥү мунньаҕар  баһылык Алексей Иннокентьев улуус 211 тыыл бэтэрээнигэр  мэдиссиинискэй  маасканы уонна дезифекциялыыр сириэстибэлэри ылан биэрэргэ кулун тутар ыйдааҕы хамнаһын аҥаарын биэрэрин туһунан иһитиннэрдэ.

Улуус уонна тэрилтэлэр  салайааччыларын, нэһилиэктэр баһылыктарын уонна улууска баар федеральнай, өрөспүүбүлүкэтээҕи тэрилтэлэр салайааччыларын кини холобурун батыһан,  кырдьаҕастарга, кыамматтарга ким төһөнү кыанарынан көмөлөһөллөрүгэр ыҥырда.

Урбаанньыттар биэрбит матырыйаалларынан тэрилтэлэр үлэһиттэрэ элбэхтик кэтиллэр маасканы тигэ сылдьаллар. Улуустааҕы киин бибилэтиэкэ үлэһиттэрэ 519 маасканы тигэн дьоҥҥо түҥэттилэр, ол иһигэр Ньурбатааҕы улуустар икки ардыларынааҕы кырдьаҕастар уонна инбэлииттэр интэринээт- дьиэтигэр эмиэ тиксэрдилэр. Билэрбит курдук, үгүс дойдуну  аймаабыт коронавирус ыарыы чуолаан кырдьаҕас дьоҥҥо ордук сэрэхтээх. Онон кинилэргэ улахан болҕомто ууруллар. Күн бүгүн улуус үрдүнэн 70-тан тахса  актыыбынай чилиэннээх волонтердар куорпустара дьиэҕэ соҕотоҕун олорор кырдьаҕастарга, инбэлииттэргэ «бесконтактнай» ньыманан араас өрүттээх көмөнү оҥоро сылдьаллар: эмтэрин, аһылыктарын уонна бастакы наадалаах табаардарын аҕалан биэрэллэр».

Ньургуйаана Иванова, «Саха сирэ»  хаһыат, edersaas.ru

Хаартыска — интэриниэттэн.