Ньукуолуҥҥа — судургу ырысыаптар

Бөлөххө киир:

Ньукуолун – сахаларга сайын кэлбитин бэлиэтиир күн. Православнай христианнар сибэтиэй Николай Угодник (Чудотворец) өлүгүн Италия Бари куоратыгар көһөрүү күнүн бырааһынньыктыыллар. Николай Чудотворец оҕолорго, таптаһар паараларга, атыыһыттарга, буруйа суох эрээри накаастаммыт дьоҥҥо, кыылларга көмөлөһөр үһү.

edersaas.ru

Оттон сахалар бу бырааһынньык ис хоһоонугар дириҥник өтөн киирбэккэ эрэ, кыһарҕаннаах кыстыгы этэҥҥэ туораабыттарын, күүтүүлээх-кэтэһиилээх сайын кэлбитин, от-мас көҕөрбүтүн, сайылыкка көһүү үөрүүтүн бэлиэтииллэр.

Сахаҕа күөххэ үктэнэр, айылҕа чэлгийэ тылларын көрөр саҕа үөрүүлээх туох баар буолуой? Ол аата тоҥуу-хатыы, күннэтэ оттук мас, сүөһү туһугар өрө мөхсүү түмүктэнэр, үрүҥ илгэ дэлэйэр, айылҕалыын, Айыылардыын алтыһыы күүһүрэр, киһиэхэ күүс-сэниэ эбиллэр… Ол да иһин өбүгэлэрбит баар-суох үчүгэй астарын астанан, ис-истэриттэн үөрэн-көтөн, манньыйан олорон аһыыр, бэлиэтиир буоллахтара.

Бу үгэс билиҥҥэ диэри тутуһуллан тиийэн кэлбитэ кэрэхсэбиллээх. Ыам ыйын 22 күнүгэр хас биирдии саха ыала алаадьы, саламаат астанар, баар буоллаҕына, кус миинин буһарынар.

Үлэлиир, солото суох хаһаайкаларга судургу, түргэн ырысыаптары бэчээттиибит.

Дьиэтээҕи лапсалаах кус миинэ

Куһу ууга уган, буһарабыт. Онтон 2 сымыыкка туус кутан, ытыйабыт. Бу кэннэ бурдук кутан, алаадьы хойуу тиэстэтин курдук буолуор диэри үчүгэйдик булкуйабыт. Кондитерскэй испириискэ, эбэтэр халыҥ салапаан пакетка кутан, биир муннугун кыратык кырыйан баран, оргуйа турар мииҥҥэ субуруччу кутабыт. Тиэстэ ууга түһээт, тута буһан хаалар, дьиэтээҕи лапса бэлэм! Тиэстэни эллээн, мэһийэн, тэнитэн, кырбаан, бириэмэҕин бараабаккын.

Сэлиэйдээх кус миинэ

Кус буспутун кэннэ, улахан чааскыга миинин баһан ылабыт. Сойо түспүтүн кэннэ, бурдугу кыра-кыралаан кутан, ытыйабыт. Хомуога суох, хойуу буолуохтаах. Сэлиэйи мииҥҥэ кутан баран, оргута түһэбит, оччоҕо хойдор. Луугу, укробу эбиэххэ сөп. Хойуу сэлиэйдээх мииҥҥэ лапса да, хортуоска да наадата суох.

Алаадьы

Утах бытыылкатыгар ыстакаан үүтү, ыстакаан аҥаара ууну, 2 сымыыты, тууһу, 1-2 ост. ньуоска саахары, бурдугу кутан баран, сахсыйабыт. Тиэстэтэ хойуу буолуохтаах. Уонча мүнүүтэ туруора түстэххэ, алаадьы үллэр, сымнаҕас буолар. Бытыылкаттан бэйэтиттэн хобордооххо кутан, алаадьылыыбыт. Бу судургу ырыссыап элбэх иһити марайдаабакка, түргэнник буһара охсорго ананар.

Саламаат (Тарбаахап ырысыаба)

1-3 ост. ньуоска сүөгэйгэ 1 ост. ньуоска ынах арыытын, 5-6 ост. ньуоска үүтү эбэн, хобордооххо буһарабыт. Сыыйа 1 ост. ньуоска бурдугу, тууһу, 1 ост. нь. саахары эбэн, мас лаппаахынан, ытыгынан тохтоло суох булкуйабыт. Саахара да суох буолуон сөп. Арыыта ууллан, үрдүгэр тахсыар диэри, мөлтөх уокка буһарабыт.

Ангелина Васильева, “Саха сирэ” хаһыат, edersaas.ru

+1
0
+1
0
+1
0
+1
0
+1
0
+1
0
+1
0