Маны аах Уопсастыба

Ньукуолуҥҥа нөмүгүлэр кырдьаҕастарын күндүлүөхтэрэ

Хаҥалас улууһугар, Нөмүгүгэ, нэһилиэк кырдьаҕастарыгар Ньукуолуҥҥа кус амсатар үтүө үгэстээхтэр.
Бэһис сылын ыытыллар тэрээһиҥҥэ, баҕа өртүнэн кыттааччы, булдуттан бэрсээччи элбээн иһэрэ бэлиэтэнэр.
Аҕалар түмсүүлэрин бэрэссэдээтэлэ Кузьма Острелин аҕалар түмсүүлэрэ оччолорго көҕүлээбит тэрээһинин нэһилиэк дьаһалтата (оччолорго баһылык Максим Васильев) тута өйөөбүтүн бэлиэтиир.
«Бу тэрээһиҥҥэ кыттааччы сыллата элбээн иһэр. Наум Устинов баһылыктаах дьаһалта, дьахталлар сэбиэттэрэ, булчуттар, оскуола кэлэктиибэ, дьиэ кэргэн тапталлаах ийэлэрэ, кэргэттэрбит.
Коронавирус дьаҥа туруон иннинэ, Ньукуолун күнүгэр бырааһынньыктааҕы остуолу оскуола остолобуойугар бэлэмнииллэрэ, аһынан-үөлүнэн хааччыйаллара. Оттон биһиги сүрүн сыалбыт — уһун тымныы кыһын кэнниттэн, аҕам саастаах дьоммут, кырдьаҕастарбыт минньигэс аһы амсайа-амсайа ирэ-хоро сэһэргэһэллэрин, астына-дуоһуйа сынньаналларын тэрийии буолара«, — диир Кузьма Кузьмич.
Ньукуолун күнүгэр тэрээһиннэрин ааспыт сылларга ыһыахтыыр сирдэригэр тэрийбиттэр. Онно кырдьаҕастарын аҕаларга, илдьэргэ тырааныспарынан хааччыйбыттар. «Остуол хотойорунан ас-үөл тардыллар: кус миинэ, алаадьы, сахалыы ас-үөл арааһа. Хаһаайкалар кырдьаҕастары үөрдээри наһаа кыһанааччылар«, — диэн тэрээһини көҕүлээччилэртэн биирдэстэрэ кэпсиир. Былырыыҥҥы тэрээһиннэригэр биллэр биричиинэнэн түмпэтэхтэр. Ол оннугар, булчуттар бултарыттан күндүлээбиттэр. «Былырыын дьаҥ туран, хаарыаннаах тэрээһиммит буолбатаҕа. Онон кустары дьиэлэригэр тиэрдэн биэртэлээбиппит, хантаага суох, барыта ыраахтан, сэрэнэн, ирдэбили тутуһан«, — диэн этэллэр.
Кузьма Кузьмич нэһилиэнньэ уопсай тэрээһиҥҥэ ордук кэнники сылларга наһаа көхтөөхтүк кыттар буолбутун киэн туттан бэлиэтиир. «Мин аҕа уонна нэһилиэкпитигэр аҕалар түмсүүлэрин бэрэссэдээтэлэ  буоларбынан,  оҕолорбутугар үчүгэй холобуру көрдөрөбүт дии саныыбын. Биһиги эмиэ сааһырыахпыт, кырдьыахпыт. Онно быыкаайкаан сырыттаҕына көрбүт оҕолорбут улаатаннар биһиэхэ, кырдьаҕастарга, кыһамньыларын ууран көмөлөстөхтөрүнэ, өйөөтөхтөрүнэ наһаа үөрүөхпүт дии», — диэн этэр.
Нөмүгүгэ кырдьаҕастарын күндүлүүр-маанылыыр үтүө үгэстэрэ быйыл эмиэ салҕанар. Булчуттар кустарыттан үөрэ-көтө биир дойдулаахтарыгар, кырдьаҕастарыгар, түҥэтиэхтэрэ. Биллэн турар, бары санитарнай ирдэбил тутуһуллуо. Манна эбэн эттэххэ, бу аахсыйаҕа Хаҥалас улууһун нэһилиэктэрэ эмиэ кытталлар.
Хаҥалас улууһун дьаһалтатын пресс-киинэ
Хаартыскалар Нөмүгү с. архыыбыттан
0
1