Чурапчы улууһугар кусчуттар «Чурапчыга Ньукуолун күнэ» диэн үтүө санаа аахсыйатын тэрийбиттэр. Кинилэр ыам ыйын 20 күнүгэр диэри бултаабыт көтөрдөрүн мунньаннар, аҕам саастаахтарга уонна бэтэрээннэргэ Ньукуолун күнүгэр туттарар баҕалаахтар. Бу хамсааһыны эдэр урбаанньыт Айсен Толстоухов көҕүлээбит. Айылҕа күндүлээбитигэр кини өссө эбии бэйэтин маҕаһыыныттан ас-үөл эбэр былааннаах.
—Бу амарах сүрэхтээхтэр үтүө быһыылара. Чурапчы эдэр дьоно өбүгэлэрин үтүө үгэһин тутуһалларын, салгыылларын сэргэ, кинилэр өссө үтүө дьыаланан дьарыктаналлара кэрэхсэбиллээх. Чурапчыга үтүө дьыаланы оҥоруу элбээн иһэрэ биһигини үөрдэр, — диэн улуус баһылыга Андрей Ноговицын эттэ уонна бу хамсааһыны өйүүргэ ыҥырда диэн sakha.gov.ru суруйар.
Кини Чурапчы улууһугар кырдьаҕастарга, аҕам саастаах дьоҥҥо ытыктабыл бэлиэтинэн, Ньукуолуну өрө көтөҕүллүүлээхтик, тэрээһиннээхтик ылалларын эппит. Сыл ахсын нэһилиэктэрин олохтоохторун бултаабыт бултарынан күндүлүүллэрэ өрүү үөрэ-көтө салҕанар. Хадаарга, Мугудайга кус миинин буһаран, алаадьылаан, өбүгэ аһын-үөлүн улахан остуолга хото тардан, биир дойдулаахтарын күндүлүүллэрэ үтүө үгэскэ кубулуйбут.
Санатан эттэххэ, ыам ыйын 22 күнэ — Ньукуолун күнэ. Бу күнүкөрсөөрү, сахалар былыр-былыргыттан эрдэттэн бэлэмнэнэллэр. Ньукуолун күн остуолга хайаан да алаадьы, кус миинэ баар буолар диэн Чурапчы улууһун дьаһалтатын пресс-сулууспата бэлиэтээбит.