Быйыл Хатас отчуттара от үүнүүтэ куһаҕана суох диэн сыана быһаллар.
edersaas.ru
Моой отчут Николай Попов күн-дьыл туран биэрбитин туһанан, тиэхиньикэ көмөтүнэн үс күн устата соҕотоҕун оттоон, кыстыкка сөп буолар 20 туонна оту кыбыытыгар киллэрдэ. Онон бу күннэргэ дьоруой буолан, кэргэниттэн хайҕанна, уолун сөхтөрдө. Санаан да көрдөххө, кыстык боппуруоһа быһаарылыннаҕына, эр дьоммутун дьоруойтан намыһахтык сыаналаабат буоллахпыт.
— Сааскы халааҥҥа Өлүөнэ Эбэбит хаатыттан улаханнык тахсыбатаҕа, хара уу эмиэ наһаа халыйбатаҕа. Анды саҕана киин улуустарга ардаабатаҕа, инньэ гынан сорох сиринэн курааннааһын да баар. Ол эрээри, саба быраҕан эттэххэ, от баар, — диэн кэпсиир сэһэргэһээччим.
Николай Семенович уола Коля да үлэһит бөҕө киһи. Оҕо эрдэҕиттэн аҕатын кытта бииргэ сылдьан, тыа сирин олохтооҕун хайа да үлэтиттэн толлон-саллан турбат иитиилээх ыччат. Үлэтинэн бириэмэтэ суох буолан, аҕатыгар өрөбүллэргэ эрэ көмөлөһөр кыахтаах.
Николай Попов ходуһатыгар кэккэлэһэ кинилиин мэлдьи биир кэмҥэ киирэр, өрүү күлэ-үөрэ сылдьар эмиэ биир Ньукулайын — Николай Соловьеву хайгыы кэпсиир. Өбүгэ үгэһинэн үүтүнэн аһатар сүөһүнү тутан олорор, эмис эти дэлэтээри Дьөһөгөй оҕотун иитэр, айылҕаны кытта күннэтэ алтыһар ыччат, хомойуох иһин, билигин олус аҕыйах. Николай Соловьёв — элбэх оҕолоох ыал аҕата.
Кини кэргэнэ Светланалыын биир сүбэнэн судаарыстыбаттан бэриллибит көмөнү сөпкө туһанан, сөптөөх тиэхиньикэнэн хааччынан, кими да наймыласпакка, дьиҥ бэйэтин күүһүнэн оттоон-мастаан, дьаһанан олорор.
Дьэ, ити курдук икки көлүөнэ Ньукулайдар бииргэ ыаллаһан, күөх дуолтан үрдүк суортаах сыа оту сыа-сым курдук оттуу охсон, хомуйан, урулуоннаан төгүрүтэн, бырысыаптарын толору тиэнэн, Хатаһы биир гынан тиэргэннэригэр тиэртилэр.
Николай Семенович кэргэнэ Евдокия Семеновналыын кыстык отторун хааччыммыт үөрүүлэригэр Эбэлэрин мырааныгар тахсан, сирдэрин-уоттарын аһаттылар.
Aлҕаатылар, махтаннылар, от сезонун бүтэрбит үөрүүлэригэр хаартыскаҕа түстүлэр.
Дьиэлэригэр кэлэн аны тиэргэннэригэр сиэннэрин кытта оһохторун аһаттылар. Онон кыстык оту булуммут сиэр-туом толору толорулунна.
Отторун толору тиэммит үлэ дьонун аара суолга көрсүбүт хатастар биир дойдулаахтарбытын кыстыыр отторун хааччыммыттарынан айхаллыы көрүстүбүт.
«Саха сирэ» хаһыат, edersaas.ru анаан
Наталья РУФОВА, Хатас нэһилиэгэ.
