Хотугу эргимтэҕэ сытар Ньычаалаахха саҥа ДЭС үлэҕэ киирэригэр бэлэмнииллэр
“Сахаэнерго” Аллайыаха оройуонун Ньычаалаах сэлиэнньэтигэр саҥа модульнай дизельнэй ыстаансыйаны таҥан үлэлэтэн көрдө, диэн хампаанньа пресс-сулууспата иһитиннэрэр.
Ньычаалаах дизельнэй ыстаансыйатын “Сахаэнерго” инвестицияҕа бырагырааматын көмөтүнэн туттулар. ДЭС үс блок-модулун хампаанньа производственнай сыаҕын исписэлиистэрэ оҥордулар, таҥар кэмҥэ модуллары биир кэлим уот эбийиэгэр холбоотулар. Саҥа ыстаансыйа мастарыскыайдаах, насоснай, уопсай массыына саалалаах, операторскайдаах, уматыгы харайар хостоох. Ыстаансыйа 320 кВт кыамталаах. Сэлиэнньэни уотунан Арассыыйаҕа оҥоһуллубут биэс дизель-генератор хааччыйыаҕа.
“Сахаэнерго” АУо кылаабынай инженерэ Петр Кондратьев: “Күн бүгүн ыстаансыйа быһаччы үлэлээн барар кыахтааҕын бэрэбиэркэлээн, холбоон, үлэлэтэн көрөллөр. Билигин бары филиалларбытыгар былдьаһыктаах кэм – кыстыгы туораатылар, оттугу уонна саппаас чааһы тиэрдэллэр, аны өрөмүөн уонна кэлэр кыстыкка бэлэмнэнии күүтэр”.
СИА.