Новосибирскайга олорор саха учуонайа – Чурапчы улууһун Ытык киһитэ

Наука уонна тиэхиньикэ эйгэтигэр РФ Бырабыыталыстыбатын Бириэмийэтин лауреата, медицинскэй диагностика сириэстибэлэрин оҥорор “Вектор-Бест” ЗАО  Новосибирскайдааҕы институту төрүттээччи, бастакы дириэктэрэ, химическай наука кандидата Алексей Аммосовка, улуус дьокутааттарын уонна улуус баһылыга Андрей Ноговицын быһаарыыларынан,  “Чурапчы улууһун бочуоттаах гражданина” үрдүк аат иҥэрилиннэ.

Ол туһунан б.дь. бэс ыйын 11 күнүгэр Саха Өрөспүүбүлүкэтин “Чурапчы улууһа” МТ Дьокутааттарын улуустааҕы сэбиэтин (бэрэссэдээтэл А.А.Захаров) сүүрбэ ахсыс (уочарата суох) сиэссийэтин 117 N-х  быһаарыыта таҕыста.

Бочуоттаах аат  Алексей Дмитриевич Аммосовка, өр сыллаах үтүө суобастаах үлэтин уонна төрөөбүт дойдутун, Чурапчы улууһун социальнай-экэнэмиичэскэй сайдыытыгар улахан кылаатын иһин иҥэрилиннэ.

Биир дойдулаахпыт, учуонай А.Д.Аммосов туһунан сиһилии кулун тутарга edersaas.ru саайт, муус устарга “Саха сирэ” хаһыат  суруйбуттара.

Сүрүн хаартыскаҕа: СӨ бастакы бэрэсидьиэнин М.Е.Николаевы кытта Новосибирскайга. Академгородок. 1999 с., бэс ыйа. А.Д.Аммосов хаҥастан иккис турар.

Татьяна Маркова, «Саха сирэ» хаһыат