Robinson бөртөлүөт пилота Александр Новосельцев Муома хайаларыгар саахалга түбэспитин кэннэ кини кэргэнэ Елена Новосельцева суруйбут көрдөһүүтэ батсаап ситиминэн тута тарҕана түспүтэ.
edersaas.ru
Ыксаллаах балаһыанньаҕа түбэспит дьахтар Муома улууһун Улахан Чыыстайыгар олорор дьону, табаһыттары волонтер быһыытынан балаҕан ыйын 29 күнүгэр, халлаан туруга мөлтөҕүттэн бөртөлүөтүн, очуос хайа быыһыгар түһэрэргэ күһэллибит Александр Новосельцевы көрдүүргэ көрдөспүтэ. «Кэргэним итии таҥаһа суох, эчэйииттэн бааһырбыт. Хас биирдии мүнүүтэ күндү. Кытаатыҥ, биһиги дьиэ кэргэн уустук балаһыанньаҕа түбэспит кэммитигэр күүс-көмө, өйөбүл буолуҥ дуу…» — диэн Елена батсаапка суруйбута.
Пилот кэргэнэ ити суруйбутун кэнниттэн бэһис күнүгэр бүгүн, алтынньы 3 күнүгэр, Александр Новосельцевы быһааччылар булбуттарын туһунан истэн, бары да олуһун үөрдүбүт. Мин Robinson бөртөлүөт пилота кэргэнэ Елена Новосельцеваны кытта кэпсэтэ сырыттым.
— Мин өрөспүүбүлүкэ суруналыыстарыгар ис сүрэхпиттэн махтанабын. Кинилэр Александр Новосельцев саахалга түбэспитин, быыһыыр сулууспа туох миэрэни ылан эрэрин туһунан күн аайы хас чаас аайы дьоҥҥо-сэргэҕэ субу-субу араадьыйанан, телевидениенэн, хаһыатынан, интернет-сайтарынан биллэрэ олордулар. Инньэ гынан Саха сирэ барыта Александр быыһанарын туһугар Таҥараттан көрдөһүүтэ, баҕа санаата биһиги дьиэ кэргэҥҥэ биллибэт ситиминэн күүһү-уоҕу эптэ, Сашам тыыннаах хааларыгар эрэли үөскэттэ. Махтанабын быыһыыр сулууспа үлэһиттэригэр. Күн-дьыл төһө да куһаҕанын үрдүнэн, быыһааччылар эрэллэрин сүтэрбэккэ, пилокка көмөлөһөр соруктаах үлэлээтилэр. Махтанабын Сахам сирин бары олохтоохторугар. Сэрэйэбин: төһөлөөх үгүс киһи сылаас дьиэтигэр аһыы олорон, утуйаары сытан, үлэтин кэмигэр кини туһунан сонуннары ааҕа олорон: «Оо, Айыы Таҥара, Александр Новосельцевка көмөлөс, тыыннаах хааллар даа..!» — диэн көрдөспүтэ буолуой! Дьиэ кэргэним аатыттан бука барыгытыгар, күндү Сахам сирин дьоно-сэргэтэ, барҕа махталбын тиэрдэбин, — диэн бэйэтин санаатын тиэртэ кытаанах санаалаах буолан, кэргэнэ тыыннаах көстөрүгэр эрэлин сүтэрбэтэх Елена Новосельцева.
Биир дойдулаахтарын дьылҕатын туһугар 34 №-дээх Халыма-Индигиир уокуругун улуустарын батсаап бөлөҕүн дьоно бу күннэргэ Муоматтан, Орто Халыматтан, Өймөкөөнтөн бииргэ сибээстэһэ олордулар.
«Үчүгэй уол. Соҕотох ийэҕэ иитиллибитэ. Олус үчүгэй иитиилээх ыччат. Убаҕас уонна кытаанах бөҕү хомуйар, тиэйэр дьоҕус бизнеһи тэринэн үлэлиир предприниматель. Дьону тиэйэр лицензията суох, ол иһин вертолетугар киһини ылбат бэйэтэ эрэ көтөр. Дьоҥҥо өрүү көмөлөһөр өйүүр санаалаах ыччат быыһаныаҕа диэн эрэнэбит«, — диэн билиһиннэрэн суруйбуттара халымалар.
«Тымныы диэн тугун билэр дьон биһиги олус санаарҕыыбыт. Хоту дойду уола хайаан да тулуйуо, быыһаныа диэн эрэнэбит!» — диэн суруйбуттара өймөкөөннөр.
«Барахсан эдэр буолан тулуйсара буоллар. Тыыннаах хааларын туһугар Таҥараттан көрдөһүөҕүҥ…» — диэн суруйбуттара муомалар.
Ити курдук, бөртөлүөт пилотун тапталлаах кэргэнэ Елена Новосельцева бэлиэтээбитин курдук, мүччүргэннээх сырыыттан этэҥҥэ босхоломмут хорсун санаалаах, өлүүнү кыайбыт Александр Новосельцев тыыннаах хааларын туһугар санаарҕаабыт Саха сирин дьоно дьэ, «ҺУУ!..» диэн өрө тыынныбыт. Бары уустук боппуруос ити курдук дьоллоохтук быһаарыллан истин!
Елена ПОТОЦКАЯ, «Саха сирэ» хаһыат, edersaas.ru
Хаартысканы СИА—тан уонна видеону 34 №-дээх Халыма-Индигиир уокуругун улуустарын батсаап бөлөҕүттэн ыллым.