Күөн-күрэскэ араас эйгэҕэ бастыҥ сүүрээни, сонуну олоххо киллэрэр көхтөөх дьон кытталлар.
edersaas.ru
Бу күннэргэ сэтинньи 15 күнүгэр диэри сайаапкалары хомуйуу ыытыллар. Куоластааһын — сэтинньи 19 күнүттэн.
Сайаапкалары gordost-yakutii@mail.ru электроннай почтаҕа ыытаҕыт.
Интэриэһиргиир ыйытыыларгытын 89644212661 төлөпүөҥҥэ эрийэн биэриҥ. Сайаапкаҕа эбии үс хаартыска ирдэниллэр. «Сонуну айааччы (новатор)» номинацияҕа 14 сааһыттан 85 сааһыгар диэри Саха сиригэр олорор киһи кыттыан сөп.
Номинацияҕа кыттааччы кылгастык ханнык бырайыагы олоххо киллэрбитин сырдатар. Онно интэриниэккэ, өҥөнү оҥорууга, олоххо-дьаһахха туох сонуну айбытын холобурдуур. Кыттааччы бу айар үлэтигэр туох уустугу көрсөн, ону хайдах туораппытын, ким кинини өйүүрүн суруйара наада. Ханнык куонкурустарга кыттан, граннарга тиксибитин ыйдаҕына өссө бэрт.
«Бастыҥ» номинация иһин куонкурус үлэ түмүгүн таһаарар, талааннары көрдүүр куоластааһын буолбатах. Бу аттыбытыгар үлэлии сылдьар, таптыыр идэлэригэр, интэриэстэригэр таба тайаммыт, үлэттэн, таптыыр дьарыктарыттан дьоллонор дьону кэмигэр бэлиэтээн көрүү буолар. Кинилэргэ махтал тылларын саамай үлэлэрин, айар-тутар кэмнэрин үөһүгэр сырыттахтарына этэн үөрдүү.
«Саха сирин киэн туттуута» норуот бириэмийэтин тэрийээччи — «Сахамедиа» холдинг («Якутия» уонна «Саха Сирэ» хаһыаттар, YSIA.RU информагентство, edersaas.ru, gazetayakutia.ru, ulus.media саайтар).
Генеральнай спонсордар — «Көмүлүөк» саха иһитин оҥорор уонна «Киэргэ» ювелирнай фирмалар.
Елена ПОТОЦКАЯ, «Саха сирэ» хаһыат, edersaas.ru