«АЛРОСА» хампаанньа 2018 сыллааҕы түмүктэрин таһаарар, 2019 сылга саҥа былааннарын билиһиннэрэр «Хозактив-2019» форумугар генеральнай дириэктэр Сергей Иванов уонна Ил Дархан Айсен Николаев суруналыыстар ыйытыыларыгар хоруйдаатылар.
Ол курдук, тэрилтэ айылҕа баайын хостуур сиригэр социальнай эппиэтинэстээх буолуу бэлиитикэтин быһыытынан, өрөспүүбүлүкэҕэ уһуйаан, оскуола, балыыһа тутуутун үбүлүүр. Бу хайысханы инникитин өссө сайыннарар чинчилээх. Биир өттүнэн, алмаастаах хампаанньа үлэтин сүнньүгэр сыһыана суох салааларыттан сыл ахсын босхолонон иһэр. Ол курдук, эти-үүтү астыыр «Новай» сопхуос, Сунтаар Кэмпэндээйитигэр баар санаторий хаһаайыннара уларыйан, өрөспүүбүлүкэ бас билиитигэр киириэхтэрэ. Ол туһунан «АЛРОСА» хампаанньа уонна СӨ Бырабыыталыстыбата араас ньыманы толкуйдаан, кэпсэтии ыыта сылдьаллар.
Тыа хаһаайыстыбатынан дьарыктанар «Новай» сопхуоһу өрөспүүбүлүкэ өйүөҕэ, алмаастаах түөлбэҕэ сибиэһэй эт, үрүҥ ас куруук баар буоларын ситиһиэхпит», — диэтэ Ил Дархан Айсен Николаев.
Марианна ТЫРТЫКОВА, «Саха сирэ» хаһыат, edersaas.ru
Сүрүн хаартыска: интэриниэттэн