Көмүс күһүн күрэнэн, кыһын тыына биллэн, хаһаайыстыбалар сайылыктарыттан кыстык хотонноругар кэлитэлээн эрэллэр. Хас улуус ахсын сүөһү кыстыкка хайдах туруктаах киллэриллэрин, аҕыс ыйдаах уһун кыһыҥҥа хотоннор төһө бэлэмнэрин бэтэринээринэй сулууспа үлэһиттэрэ мэлдьи көрөллөр-истэллэр.
Мииринэй бэтэринээрдэрэ улуус үгүс хаһаайыстыбаларыгар, ол иһигэр «Новай» сопхуоска эриэйдэ оҥордулар. Бу хаһаайыстыба тыһыынчаттан тахса сүөһүтүн, ол иһигэр 667 ыанар ынаҕын хас да отделениенан иитэр. Отделение ахсын ыанар ынахха анаммыт толору хааччыллыылаах комплекстар, ыччат сүөһү хотонноро бааллар.
Арыылаахтааҕы отделение хотоно бөһүөлэктэн 500 миэтэрэ ыраах сиргэ турар, кутуу суоллаах. Сайын, сүөһүлэри сайылыкка таһааран баран, үлэһиттэр комплексы ирдэбил быһыытынан ыраастаабыттар, салгылаппыттар, эмтээбиттэр, туох наада буоларынан өрөмүөннээбиттэр, күрүөтүн-хаһаатын саҥардыбыттар. Даҕатан эттэххэ, кыһын устата ноһуом хотонтон тэйиччи таһаарыллар, бааһынаҕа уоҕурдуу быһыытынан туһаныллар. Хаһаайыстыба кыстыгы туоруур сөптөөх аһылыгын хааччыммыт, окко уонна сиилэскэ былаанын толорбут, ону таһынан ынахтарыгар ый устата сиэтэр комбикуорумун аҕалбыт. Түрбэлэммит оттор сабыылаах сарайга, оттон сиилэс икки траншеяҕа, комбикуорум ыскылаакка ууруллан тураллар. Ыанар ынах да, ньирэйдэр да туруктара үчүгэй. Эриэйдэ түмүгүнэн сопхуос бары отделениеларынан кыстыгы бэлэмнээх көрсүбүтэ быһаарылынна. Бу туһунан биһиэхэ Мирнэйдээҕи бэтэринээринэй управление начаалынньыга Валерий Кравцов иһитиннэрдэ.
Раиса Сибирякова, “Саха сирэ” хаһыат, edersaas.ru.
Комплекс ыраастаммыт, сөргүтүллүбүт, эмтэммит.
Сайын устата ньирэйдэр улааппыттар, уойбуттар.
Кыстыыр от түрбэлэнэн сабыылаах сарайга угуллубут.