Бу сарсыарда Ленскэй улууһун Нотуора нэһилиэгэр күүстээх тобурах түһэн, улахан хоромньуну оҥорбутун туһунан сонун батсаабынан өрөспүүбүлүкэни тилийэ көттө.
edersaas.ru
Балаһыанньаны сиһилии билсээри, нэһилиэк баһылыга Эдуард Тимофеевы кытта кэпсэттим:
—Бэҕэһээ 17 чаас саҕана сүүрбэччэ мүнүүтэлээх тобурахтаах күүстээх ардах түһэн ааста. Нэһилиэкпитигэр хоромньу бөҕөтө таҕыста.
Ол курдук, икки ыал дьиэтин сарайын көтүттэ. Кырыыһаларын алдьатта.
Биир да тэпилииссэ түннүгэ ордубата. Тобурах үлтү түһэн кэбистэ. Дьон массыыната эмсэҕэлээтэ.
Оҕуруот туһунан этэ да барыллыбат. Барыта ууга барда, тобурах хортуоппуй отун олох тоһутан кэбистэ.
Сөтүөлүү сылдьар дьон, тобурахха түбэһэн, эттэрэ-сииннэрэ көҕөрдө. Хаһан да маннык бөдөҥ тобураҕы харахтыы илик этибит.
Аны түүн биир чааһы быһа курулаччы ардах түстэ. Оппут барыта сытан хаалла. Бу күннэргэ оттуу тахсаары бэлэмнэнэ сылдьыбыппыт.
Кырдьаҕастар да бэлиэтииллэринэн, бэйэм да өйдүүрбүнэн, хаһан да маннык түбэлтэ тахса илигэ.
Ханна да (интэриниэккэ) ардах түһэр диэн билгэ суоҕа. Куйаас күн турбута. Эмискэ кэлэн түстэ. Буолаары буолан, биһиги эрэ нэһилиэкпитигэр. Биһигиттэн 7 км тэйиччи баар Нүүйэ нэһилиэгэр ардах сибикитэ да биллибэтэх.
Бу сарсыарда улуус дьаһалтатыгар биллэрэммит, анал хамыыһыйа иһэр. Хамыыhыйаны баһылыгы тутууга солбуйааччы салайар. Тахсыбыт хоромньуга аакта оноруохпут, хаартыскаҕа түһэриэхпит. Ол кэнниттэн улуус салалтата быһаарыныы ылыныаҕа.
… Быйылгы сайын уратылаах буолуоҕун туһунан норуот синоптига Тускул хаста да анаан сэрэтэн турар. «Улахан күүстээх тобурахтар кэлэн түһүөхтэрэ, онон эрдэттэн бэлэм буолуҥ», — диэн эмиэ бэлиэтээн эппитэ.
Бүгүн киэһэ киин куоракка этиҥнээх ардах түһэр диэтилэр. Онон оҕуруотчуттар эрдэттэн сэрэниҥ.
Елена ПОТОЦКАЯ, «Саха сирэ», edersaas.ru
Хаартыска: «Нотуора нэһилиэгэ» МТ дьаһалтатын архыыбыттан.