Норуоттар икки ардыларынааҕы Арктика оскуолата аһыллан эрэр
Норуоттар икки ардыларынааҕы Арктика оскуолата аһылларын туһунан үгүскүт истибит буолуохтаах. Дьэ, силигин ситэн, эһиилгиттэн үлэтин саҕалыа диэн, Дьокуускай куорат национальнай гимназиятыгар буолан ааспыт “төгүрүк остуолга” иһитиннэрдилэр.
edersaas.ru
Тэрээһиҥҥэ СӨ үөрэҕин уонна наукатын миниистирэ Владимир Егоров, Ил Түмэн сис кэмитиэтин бэрэссэдээтэлэ Феодосия Габышева, Норуоттар икки ардыларынааҕы оскуола бырайыактыыр офиһын салайааччыта Наталья Ситникова, Дьокуускай куорат национальнай гимназиятын, Амма лиссиэйин, улуус оскуолаларын бэрэстэбиитэллэрэ, төрөппүттэр кытыннылар.
Оскуола 220 миэстэлээх буолуоҕа. Атын оскуолалартан уратыта диэн, үөрэнээччилэри Арассыыйа ыстандаардынан уонна норуоттар икки ардыларынааҕы бакалавриат бырагырааматынан үөрэтиэхтэрэ. Маныаха бэлэмнэнии үлэтэ барбыта быданнаата. Ол курдук, Казахстаҥҥа, Арменияҕа, Финляндияҕа, Арассыыйа атын да регионнарыгар баар ханыылыы оскуолалар уопуттарын үөрэппиттэр.
Тустаах оскуолаҕа оҕолору 5-с кылаастан сүүмэрдиэхтэрэ. Бастакы сыл 5-8 уонна 10-с кылаастарга ылаттыахтара. Балаһыанньа быһыытынан, нуучча, англия тылларыгар, математикаҕа тестированиены ааспыт, араас олимпиадалар кыайыылаахтара, Норуоттар икки ардыларынааҕы Арктика оскуолатын биридимиэтинэн олимпиадаларын призердара талыллыахтара. Ол эрээри, миниистир Владимир Егоров иһитиннэрбитинэн, 2020 сылга оскуола аһыллаатын кытта тута норуоттар икки ардыларынааҕы бакалавриат бырагырааматынан үөрэтэн барыаҕа, дипломнары биэртэлиэ диэн өйдүүр сыыһатын, барыта сыыйа-баайа киириэн эттэ.
Үөрэтии хаачыстыбалаах буоларын, барыларыгар тэҥ усулуобуйаны олохтуур сыалтан кынат-оскуолалары (школы-спутники) тэрийэр санаалаахтар. Ил Түмэн дьокутаата Феодосия Габышева: “Биһиги норуоттар икки ардыларынааҕы бакалавриат бырагырааматынан, тас дойду ааттаах-суоллаах үрдүк үөрэхтэрин кыһаларыгар киирэр сэртипикээти ылар кыаҕы үөскэтиэхпитин баҕарабыт. Өрөспүүбүлүкэ араас оскуолаларыгар хаачыстыбалаах үөрэҕи ылалларын хааччыйыахтаахпыт” , — диэн бэлиэтээтэ.
Дьокуускай куораттааҕы национальнай гимназия учуутала Егор Дьячковскай: “Уопут быһыытынан, быйылгы үөрэх дьылыттан үһүс кылаастарга математика уруогун англия тылынан үөрэтиини киллэрдибит. Оҕолор интэриэһиргээтилэр”, — диэн кэпсээтэ. Гуманитарнай кылааска историяҕа Аҕа дойду Улуу сэриитин тиэмэтигэр эмиэ англия тылынан уруогу ыытан көрбүттэр. Тустаах гимназия учууталлара Финляндияҕа, Казахстаҥҥа үөрэммиттэр, стажировкаламмыттар, 9 педагог Москваҕа сертифицированнай кууруһу ааспыт.
Оттон Үөһээ Бүлүүтээҕи 1-кы нүөмэрдээх оскуола дириэктэрин солбуйааччы Асемгуль Молорова бэйэлэрин оскуолаларыгар норуоттар икки ардыларынааҕы бырагыраама элеменин киллэриилэрин туһунан билиһиннэрдэ. Ону тэҥэ, төрөппүттэр бэйэлэрин санааларын үллэһиннилэр.
Норуоттар икки ардыларынааҕы бакалавриат бырагыраамата – үөрэх бырагыраамата. Биир омук тылынан (англия, франция, испания) үөрэтиллэр. Тустаах бырагыраама, оскуоланы бүтэрбиттэр тас дойду бастыҥ үөрэхтэрин кыһаларыгар үөрэнэр кыаҕы биэрэр. Билиҥҥитэ, 2718 тахса оскуола баар диэн этэллэр.
Людмила ПОПОВА, “Саха сирэ” хаһыат, edersaas.ru
Ольга СТАРОСТИНА (СИА) хаартыскаҕа түһэриитэ.