Арктикатааҕы норуоттар икки ардыларынааҕы оскуола аһылынна

Ааптар: 
Бөлөххө киир:

Дьокуускай куоракка, Билии күнүгэр Арктикатааҕы норуоттар икки ардыларынааҕы оскуола аһылынна. Манна өрөспүүбүлүкэ араас муннугуттан айдарыылаах оҕолор үөрэниэхтэрэ.

edersaas.ru

Оскуола аһыллыбытынан үөрэнээччилэри уонна педагогтары норуоттар икки ардыларынааҕы таһымнаах үөрэх тэрилтэтэ тэриллэрин көҕүлээбит дьонтон биирдэстэрэ, СӨ Ил Дархана Айсен Николаев эҕэрдэлээтэ.

Улаханнык долгуйабын, тоҕо диэтэххэ бүгүн улахан бырааһынньык. Билии күнүгэр Арктикатааҕы норуоттар икки ардыларынааҕы оскуоланы эрэ буолбакка, өрөспүүбүлүкэбитигэр үөрэхтээһин систиэмэтигэр саҥа кэрдиис кэми арыйабыт. Бэлиэ күнүнэн барыгытын истиҥник эҕэрдэлиибин. Бу – үөрэх саҥа көрүҥэ. Манна Хотугу сир, Арктика сайдыытын боппуруоһунан дьарыктаныахтаах оҕолору үөрэтиэхтэрэ. Биһиги өрөспүүбүлүкэбитигэр, бүтүн дойду үрдүнэн улахан суолталаах”, — диэн Ил Дархан эттэ.

220 миэстэлээх оскуолаҕа 5-11-с кылаас оҕолоро үөрэниэхтэрэ. Ол эрээри, бастакы таҥыыга 7-с, 8-с, 10-с кылаас оҕолорун ылбыттар. Куонкурус түмүгүнэн, быйылгы үөрэх дьылыгар Саха сирин бары муннугуттан 185 айдарыылаах оҕо үөрэнэ кэлбит.

Манна оҕо эргиччи сайдарыгар барыта баар – бассейн, 194 миэстэлээх аактабай саала, 30 миэстэлээх кэмпириэнсийэлиир саала, 110 миэстэлээх остолобуой, спорт уонна хореография саалалара, планетарий, видео-устуудьуйа. Үөрэнэр хос аайы үөрэх аныгы ыстандаартыгар эппиэттиир сенсорнай интерактивнай дуоскалар, уо.д.а. тэриллэр бааллар. Улуустан кэлбит оҕолорго 80 миэстэлээх интэринээт көрүллэр.

Бу, Уһук Илин уокуругар норуоттар икки ардыларынааҕы таһымнаах Арктика аан бастакы оскуолата буолар. Манна үс тылынан — сахалыы, нууччалыы уонна английскайдыы, ону тэҥэ, омук тылыгар омук преподавателлэрэ үөрэтиэхтэрэ. Оҕолору идэлэрин таһымын үрдэтии анал кууруһун ааспыт бастыҥ учууталлар үөрэтиэхтэрэ. Тустаах оскуола үөрэнээччилэрэ аны үс сылынан норуоттар икки ардыларынааҕы бакалавриат (DP IB) дипломнай бырагыраама үөрэҕэр көһүөхтэрин сөп. Бу кинилэр аан дойду үөрэхтэрин кыһаларыгар киирэллэригэр кыаҕы биэриэҕэ.

Санатан эттэххэ, Арктикатааҕы норуоттар икки ардыларынааҕы оскуолатын (МАШ) кэнсиэписэйэтэ 2014 сыллаахха бигэргэммитэ. Тутуута 2016 сыллаахха Сэргэлээх шоссетын 12-с килэмиэтиригэр судаарыстыбаннай-чааһынай бииргэ үлэлэһии көрүҥүнэн саҕаламмыта. Бэдэрээтчитинэн Арктика оскуолатын таһынан Дьокуускай куоракка 11 социальнай суолталаах эбийиэктэри туппут «Газэнергомонтаж» хампаанньа («ВИС» хампаанньалар бөлөхтөрө) буолбута.

СӨ Ил Дарханын уонна СӨ Бырабыыталыстыбатын пресс-сулууспата.

 [vc_images_carousel images=»186078,186077,186076,186075,186073,186072,186071,186068,186067,186066,186065,186064,186063,186062,186061,186060,186059,186058,186057,186056,186055,186054,186053,186052,186051,186050″ img_size=»full»]

+1
0
+1
0
+1
0
+1
0
+1
0
+1
0
+1
0