Дьокуускайга норуоттар икки ардыларынааҕы II интеллектуальнай оонньуулар иилэринэн, «Туймаада» XXIX олимпиада олус сэргэхтик ыытылла турар. Манна физикаҕа, химияҕа, математикаҕа, информатикаҕа билиилэрин тургутуһаллар. Ил Дархан Айсен Николаев ыйааҕынан олимпиадаҕа өрөспүүбүлүкэҕэ физика, математика хамсааһынын көҕүлээччи ССРС норуодунай учуутала, РСФСР үтүөлээх учуутала Михаил Алексеев аата иҥэрилиннэ.
«Киэҥ билиилээх-көрүүлээх оҕолор муһуннулар — Ураллааҕы федеральнай университет, Казань лиссиэйэ, Румынияттан икки хамаанда, Казахстантан хас да хамаанда бааллар. Саха сириттэн тоҕус кыттааччы баар. Сүрүннээн өрөспүүбүлүкэтээҕи лиссиэй-интэринээттэн, физико-тэхиньиичэскэй лиссиэйтэн, биир кыттааччы ХИФУ СУНЦ. Маны сэргэ, олимпиадаҕа Казань IT- лиссиэйиттэн уонна ИННОПОЛИС университетыттан кытталлар», — диир дьүүллүүр сүбэ бэрэссэдээтэлэ.
Информатикаҕа дьүүллүүр сүбэҕэ 15 киһи баар. Кинилэртэн сорохторо тэйиччиттэн олорон үлэлииллэр. «Туймаадаҕа» уопуттаах кэллиэгэлэртэн — тэхиньиичэскэй наукалар кандидаттара, Ярославскай университетыттан Сергей Волченков үлэлэри сыаналыыр.
Норуоттар икки ардыларынааҕы интеллектуальнай оонньуулар Дьокуускайга от ыйын 1-10 күннэригэр ыытыллаллар.