Норуоттар икки ардыларынааҕы олимпиадаҕа бастаабыттарга – биир мөлүйүөн солкуобай
Араас таһымнаах олимпиадалар аата-ахсаана суох эбиллэ тураллар. Олортон саамай улаханнарынан норуоттар икки ардыларынааҕы олимпиада буолар. Үөрэнээччилэри, учууталлары көҕүлүүр инниттэн, Норуоттар икки ардыларынааҕы олимпиадаҕа кыһыл көмүс мэтээли ылбыттары дойду бэрэсидьиэнэ 1 мөл. солк. бириэмийэлиэҕэ.
edersaas.ru
2019 сыл олунньу 1 күнүгэр диэри ааспыт сыл түмүгүнэн уонна кэлэр сылларга уопсай үөрэхтээһин биридимиэттэригэр норуоттар икки ардыларынааҕы олимпиадалар кыайыылаахтарыгар РФ Бэрэсидьиэнин бириэмийэтин олохтуур туһунан РФ Бырабыыталыстыбатыгар ыйаах бырайыагын оҥорорго дьаһал бэриллибит.
Бириэмийэ суумата ботуччу эбит. Ол курдук, кыһыл көмүс мэтээл иһин бириэмийэ кээмэйэ 1 мөл. солк. тэҥнэһэр, үрүҥ көмүс мэтээлгэ – 500 тыһ. солк, боруонса мэтээлгэ – 400 тыһ. солк. Кинилэри бэлэмнээбит тириэньэрдэригэр эмиэ итиччэлии суума диэн ыйыллыбыт.
Ол эрээри, тустаах бириэмийэни кыайыылаах таптаабытынан уҥа-хаҥас ыһар кыаҕа суох эбит. Бастатан туран, үөрэххэ, сынньалаҥҥа, доруобуйаны бөҕөргөтүүгэ, бэйэни сайыннарыыга туһаныллыахтаах диэн ыйаллар.
Санатан эттэххэ, дойду бэрэсидьиэнэ Владимир Путин 2024 сылга диэри Арассыыйа уопсай үөрэхтээһин хаачыстыбатынан бастыҥ көрдөрүүлээх 10 дойду ахсааныгар киириэхтээх диэн эппитэ. Тустаах бириэмийэ үөрэнээччигэ, учууталга үчүгэй көҕүлээһин буолбут.
Людмила ПОПОВА, “Саха сирэ” хаһыат, edersaas.ru
Мария ВАСИЛЬЕВА (СИА) хаартыскаҕа түһэриитэ.