Норуоттар икки ардыларынааҕы интеллектуальнай оонньуулар ыытыллыахтара

Бөлөххө киир:

Бэс ыйын 30 күнүттэн  от ыйын 10 күнүгэр диэри  Дьокуускайга норуоттар икки ардыларынааҕы интеллектуальнай оонньуулар  ыыттыллыахтара. Оонньуулар үс хайысханан ыытыллаллар. Ол курдук, STEAM – бырайыактарынан чинчийэр оскуола, Sciece Fair — научнай кэмпириэнсийэ уонна математикаҕа, физикаҕа,  химияҕа үгэс буолбут Туймаада олимпиадата.

Интеллектуальнай оонньуулар икки түһүмэҕинэн ыытыллаллар. Бастакы түһүмэх кулун тутартан бэс ыйын 1 күнүгэр диэри дистанционнай  бэрээдэгинэн буолбута. Манна  айылҕа дьайыыта, киһи уонна уопсастыба, айылҕа уонна киһи, бэйэ кыаҕын  сайыннарыы курдук хайысхаларга чинчийиилэр  буолбуттара. Иккис түһүмэх (очно-дистанционнай) бэс ыйын 30 күнүттэн от ыйын 10 күнүгэр диэри ыытыллар.
Бу тэрээһиҥҥэ уопсайа 300 оҕо кыттыыны ылыаҕа, ол иһигэр ыраахтан олорон 236 оҕо кыттыаҕа. Саха сириттэн, Арассыыйа араас эрэгийиэннэриттэн уонна тас дойдуттан уопсайа 82 эспиэр кыттыыны ылыаҕа. Ол курдук, бу тэрээһиҥҥэ кыттарга Казахстан, Румыния, Сингапур, Монголия, Турция, Индонезия, Иран, Мексика дойдуларыттан сайаапкалар киирбиттэр.
Бэлиэтээн эттэххэ, маннык интеллектуальнай оонньуулар аан бастаан 2018 сыллаахха ыытыллыбыттара. Онно оҕолору, учууталлары ааҕан туран, уопсайа 1500 киһи кыттыыны ылбыта.
Тэрээһин сүрүн соругунан, үрдүк таһымнаах үөрэнээччилэри, учууталлары, учуонайдары, ону сэргэ манна болҕомто уурар төрөппүттэри түмэр норуоттар икки ардыларынааҕы уопсастыбаны тэрийии буолар. Үөрэтэр үрдүк таһымнаах былаһаакка оскуола оҕолорун наука киэҥ эйгэтигэр көҕүлүөҕэ.
Тэрийээччилэринэн СӨ Бырабыыталыстыбата, СӨ Үөрэҕин уонна наукатын министиэристибэтэ, СӨ Үүнэр көлүөнэ тус сыаллаах пуондата уонна Хотугулуу-Илиҥҥи Федеральнай университет буолаллар.

Ульяна ЗАХАРОВА.

+1
0
+1
0
+1
0
+1
0
+1
0
+1
0
+1
0