Норуоттар икки ардыларынааҕы интеллектуальнай оонньууга 500 тахса сайаапка киирдэ
Норуоттар икки ардыларынааҕы иккис интеллектуальнай оонньуулар саҕаланаллара олох кылгас кэм хаалла. Аҕыс дойдуттан 500 кэриҥэ оҕо кэлэрэ күүтүллэр. Ону сэргэ Арассыыйа араас эрэгийиэннэриттэн эмиэ кыттыахтара. Бүгүҥҥү күҥҥэ 500-тэн тахса сайаапка киирбит.
Быйылгы интеллектуальнай оонньуулар СӨ Наука дьоҕус акадьыамыйатын баазатыгар Хаҥалас улууһун Чапаев бөһүөлэгэр уонна Норуоттар икки ардыларынааҕы арктическай оскуолаҕа ыытыллыаҕа. Ол курдук кэмпириэнсийэҕэ, бэйэ бырайыагын көмүскээһиҥҥэ сайаапканы ылыы бэс ыйын 23 күнүгэр диэри, оттон Туймаада олимпиадаҕа кыттыы иһин сайаапканы бэс ыйын 26 күнүгэр диэри тутуохтара. Тэрээһин сүрүн соругунан, үрдүк таһымнаах үөрэнээччилэри, учууталлары, учуонайдары, ону сэргэ манна болҕомто уурар төрөппүттэри түмэр норуоттар икки ардыларынааҕы уопсастыбаны тэрийии буолар. Үөрэтэр, үрдүк таһымнаах былаһаакка оскуола оҕолорун наука киэҥ эйгэтигэр көҕүлүөҕэ.
Тэрээһини тэрийээччилэринэн СӨ Бырабыыталыстыбата, СӨ Үөрэҕин уонна наукатын министиэристибэтэ, СӨ Үүнэр көлүөнэ тус сыаллаах пуондата уонна Хотугулуу-Илиҥҥи федеральнай университет буолаллар.
Ульяна ЗАХАРОВА.