Өксөкүлээх Өлөксөй аатынан Норуоттар доҕордоһууларын дьиэтигэр бэс ыйын 7 күнүгэр «Россия» киинэ саалата аһыллыа. Бу саалаҕа Саха сиригэр суох улахан экран туруорулунна. Итиэннэ аан бастакынан Владимир Федоров «Созвездие Марии» пьесатынан «Первые» хартыына премьерата көрдөрүллүө.
Саала аһыллыытын көрсө бэҕэһээ пресс-конференция буолла.
Яна Игнатьева, А.Е.Кулаковскай-Өксөкүлээх Өлөксөй аатынан Норуоттар доҕордоһууларын дьиэтин генеральнай дириэктэрэ:
— Киинэ саалата баар буоларын туһунан биэс сылы быһа ыраламмыппыт. Куорат олохтоохторо өйдүүллэрэ буолуо, манна урут куруук киинэ көрдөрөллөрүн. Онон билигин киинэ көрдөрүүтүн хат эргиттибит. Киинэ пуондатын гранын үбүнэн сөргүтүлүннэ. Аны туран, саала «Россия» диэн ааттаммыта түбэспиччэ буолбатах: биһиги тэрилтэбит бэйэлэрин култуураларын көрдөрөр, билиһиннэрэр, үгэстэрин тарҕатар национальнай-култуурунай түмсүүлэри кытары ыкса үлэлэһэр. Ол иһин, бу аат бэрилиннэ. Манна араас омук киинэлэрэ көрдөрүллүөхтэрэ, «Арменфильм», «Казахфильм», «Узбекфильм» киинэ устуудьуйаларын күннэрэ буолуохтара, артыыстары кытары көрсүһүүлэр, айар киэһэлэр тэриллиэхтэрэ. Биллэн турар, куоракка элбэх киинэ тыйаатыра баар, ол да буоллар биһиги тэрээһиннэрбитигэр сылдьар дьон манна сынньана, көрө кэлиэхтэрэ диэн эрэнэбин.
Петр Чиряев, «Якутская республиканская киносеть» кинематографистар Ассоциацияларын дириэктэрэ:
— Дойду нэһилиэнньэлээх пууннарыгар култуура тэрилтэлэрин ахсаанын туһунан суруллубут нуорума туһунан ирдэбили РФ бырабыыталыстыбата 2017 с.тохсунньу 26 к. бигэргэппитэ баар. Ол ирдэбилгэ сигэннэххэ, Дьокуускайга киинэ саалата 16-тан итэҕэһэ суох буолуохтаах. Итинтэн биһиэхэ билигин 12 баар. Онон Саха сиригэр киинэ саалата арыллара үөрдэр эрэ. Норуоттар доҕордоһууларын дьиэтэ Киинэ пуондата сыл ахсын ыытар куонкуруһугар кыттан грант ылбыта. Манна даҕатан эттэххэ, ааспыт сылга Саха сириттэн түөрт эрэ сайаапка бу граҥҥа ааспыта. Онон, түгэнинэн туһанан, өрөспүүбүлүкэ култуураҕа тэрилтэлэрин бу куонкуруска кытталларыгар ыҥырабын. «Россия» киинэ саалатын туһунан эттэхпинэ, социальнай хайысхалаах буолуоҕа, араас норуоттар киинэлэрэ көрдөрүллүөхтэрэ. Киинэ айар бөлөҕө, режиссер, «Каро продакшн» прокаттыыр хампаанньа продюсера Юрий Обухов кыттыылаах Россия улахан премьератын күүтэбит. Киинэ саалатыгар күүстээх, үрдүк хаачыстыбалаах экран, аныгы проектор туруорулуннулар.
«Россия» киинэ саалатын арыллыыта, «Первые» киинэ премьерата бэс ыйын 7 күнүгэр 17.00 чаастан буолуоҕа.