Арассыыйа күнүгэр А.Е.Кулаковскай аатынан норуоттар доҕордоһууларын дьиэтэ Дьокуускай куорат олохтоохторун уонна ыалдьыттарын истиҥник эҕэрдэлээтэ. Бу туһунан пресс-сулууспа иһитиннэрдэ.
— Бүтүн Арассыыйатааҕы #МыРоссия аахсыйаҕа көхтөөх кыттыы буолла. Бүгүн тиэргэннэргэ дьоҥҥо-сэргэҕэ анаан бэртээхэй кэнсиэрдэри көрдөрдүлэр уонна Арассыыйа Өрөгөйүн ырыатын ньиргиччи ыллаатылар.
Норуоттар доҕордоһууларын дьиэтин исписэлиистэрэ бу ураты үөрүүлээх уонна долгутуулаах күн куорат 203 микрооройуонугар, 6 куорпус; Курашов уулуссатын 43 уонна «Прометей» дьиэлэрин таһыгар ыллаан-туойан, үҥкүүлээн-битийэн, коронавирус дьаҥыттан дьиэҕэ хааччахтанан олорор дьон-сэргэ болҕомтотун тартылар, улаханнык сэргэхситтилэр, үөртүлэр, махталы ыллылар. Тэрээһиҥҥэ, пандемиянан сибээстээн, туох баар ирдэбиллэр тутуһулуннулар.
Бырааһынньыктааҕы бырагыраамаҕа «Ямские бубенцы» күн судаар дьаамсыктарын удьуордарын ырыаҕа ансаамбылын уус-уран салайааччыта Ирина Стрекаловская, Норуоттар доҕордоһууларын дьиэтин уус-уран туруоруу отделын салайар Жанна Николаева, отдел сүрүннүүр исписэлииһэ Альберт Петров; С.А.Зверев-Кыыл Уола аатынан үҥкүү Национальнай тыйаатырын хореограба, балетмейстера, үҥкүүнү туруорааччы Людмила Антипина, «Өрөгөй» ансаамбыл салайааччыта Василий Старостин уо.д.а. кытыннылар. #МыРоссия аахсыйа дьон-сэргэ санаатын көтөҕөрүн, бырааһынньык настарыанньатын үөскэтэрин сэргэ, дьону-сэргэни сомоҕолоото.
Арассыыйа күнэ дьону сэргэни түмэр, иллээх-эйэлээх буолууга сирдиир ураты тыыннаах кэрэ бырааһынньык. Арассыыйа судаарыстыба быһыытынан сүдү күүһүн-күдэҕин, модунун көрдөрөр.